હૈદરાબાદ : IPL ૨૦૨૬ની સીઝન માત્ર રમત અને ચોગ્ગા-છગ્ગા માટે જ નહીં, પરંતુ માનવતાના અદ્ભુત કિસ્સાઓ માટે પણ યાદ રહેશે. સનરાઈઝર્સ હૈદરાબાદ (SRH) માટે રમતા ઈશાન કિશને પોતાના સાથી ખેલાડી સાકિબ હુસૈન પ્રત્યે જે ઉદારતા બતાવી છે, તેણે લાખો લોકોના દિલ જીતી લીધા છે. સાકિબ, જે બિહારના એક સામાન્ય પરિવારમાંથી આવે છે અને જેણે ટેનિસ-બોલ ક્રિકેટથી લઈને IPL સુધીનો સંઘર્ષમય પ્રવાસ ખેડ્યો છે, તેને ઈશાન કિશને એડિડાસના મોંઘા સ્પાઈક્સની અડધો ડઝન જોડી ભેટમાં આપીને સાબિત કર્યું છે કે સાચો ખેલાડી તે જ છે જે પોતાના સાથીની મુશ્કેલીને સમજે છે.
૧૨,૦૦૦ ના જૂતા જોઈને સ્તબ્ધ થઈ ગયો સાકિબ
સાકિબ હુસૈન માટે આ જૂતા માત્ર રમતનું સાધન નથી, પણ એક સ્વપ્ન હતું. સાકિબ અત્યંત ભાવુક થઈને બોલ્યો, "સર, ૧૨,૦૦૦ થી ૧૫,૦૦૦ રૂપિયાના જૂતા? હું એવું વિચારી પણ કેવી રીતે શકું? મારા સમયમાં તો આવા મોંઘા જૂતા પહેરવા એ કલ્પના બહારની વાત હતી." એક સમય એવો હતો જ્યારે સાકિબના પરિવારની આર્થિક સ્થિતિ એટલી ખરાબ હતી કે તે ક્રિકેટ માટે યોગ્ય જૂતા પણ ખરીદી શકતો ન હતો.
માતાના બલિદાનની અદભૂત ગાથા
સાકિબનો પ્રવાસ અત્યંત સંઘર્ષપૂર્ણ રહ્યો છે. તેના પિતાના ઘૂંટણની બીમારી બાદ પરિવારની તમામ જવાબદારી સાકિબ પર આવી પડી હતી. એક તબક્કે જ્યારે તેની પાસે ચામડાના બોલથી રમવા માટે સ્પાઇક્સ નહોતા, ત્યારે તેની માતાએ પોતાના લગ્નના અમૂલ્ય દાગીના વેચીને દીકરાના સપના પૂરા કર્યા હતા. એ જ માતાના આશીર્વાદ અને સંઘર્ષનું પરિણામ છે કે આજે સાકિબ IPLના મોટા ખેલાડીઓને આઉટ કરી રહ્યો છે.
મેદાન પર સાકિબનો દબદબો
સાકિબે પોતાની ડેબ્યૂ મેચમાં જ રાજસ્થાન રોયલ્સ સામે ૪ ઓવરમાં માત્ર ૨૪ રન આપીને ૪ વિકેટ ઝડપીને સૌને ચોંકાવી દીધા હતા. યશસ્વી જયસ્વાલ જેવા દિગ્ગજ બેટ્સમેનને પેવેલિયન ભેગો કરીને તેણે પોતાની પ્રતિભાનો પરચો આપ્યો હતો. અત્યાર સુધીમાં ૧૧ મેચોમાં ૧૫ વિકેટ ઝડપીને તેણે પેટ કમિન્સ જેવા અનુભવી કેપ્ટનનો વિશ્વાસ જીત્યો છે.
ઈશાન કિશન દ્વારા આપવામાં આવેલી આ ભેટ એ વાતનું પ્રતીક છે કે સફળતા મેળવ્યા પછી પણ પોતાની જડ (મૂળ) ને ભૂલવી જોઈએ નહીં. આજે સાકિબ હુસૈન બિહારના ગલી-મોહલ્લાના એ તમામ યુવાનો માટે આશાનું કિરણ બની ગયો છે, જેઓ ગરીબી હોવા છતાં પોતાની મહેનતના જોરે આકાશને આંબવાની હિંમત રાખે છે.