નવી દિલ્હી : વિશ્વભરના કરોડો જીમેઈલ વપરાશકર્તાઓને સાયબર સુરક્ષાના એક નવા અને ગંભીર ખતરા અંગે તાકીદની ચેતવણી આપવામાં આવી રહી છે. 'રેમસ સ્ટીલર' તરીકે ઓળખાતા એક અત્યાધુનિક દૂષિત સોફ્ટવેર (માલવેર) દ્વારા સાયબર ગુનેગારો યુઝર્સના ખાનગી મેસેજ, ઇનબોક્સ અને મહત્વપૂર્ણ વેરિફિકેશન કોડ્સ ગુપ્ત રીતે ચોરી રહ્યા હોવાનું સામે આવ્યું છે. આ ખતરનાક ટૂલ હેકર્સોને માત્ર વ્યક્તિગત ઈમેઈલ જ નહીં પરંતુ અન્ય ઓનલાઈન એકાઉન્ટ્સને પણ બારોબાર ઍક્સેસ કરવાની ક્ષમતા પૂરી પાડે છે.
હડસન રોકના સાયબર સુરક્ષા સંશોધકોના જણાવ્યા મુજબ, ડાર્ક વેબ અને ભૂગર્ભ હેકિંગ ફોરમ પર આ સોફ્ટવેર દર મહિને ૧,૦૦૦ ડૉલરના સબ્સ્ક્રિપ્શન સાથે ખુલ્લેઆમ વેચાઈ રહ્યું છે. આ માલવેર પીડિતોના બ્રાઉઝર સેશન ટોકન્સને નિશાન બનાવે છે, જેના કારણે યુઝર્સ પાસવર્ડ બદલી નાખે અથવા બ્રાઉઝર બંધ કરી દે તો પણ હેકર્સ લાંબા સમય સુધી મેઇલબોક્સની વિગતો જોઈ શકે છે. જોકે, ગૂગલે સ્પષ્ટતા કરી છે કે આ કોઈ જીમેઈલની આંતરિક નબળાઈ નથી, પરંતુ સામાન્ય ઇન્ફોસ્ટીલર માલવેર હુમલો છે જે વ્યક્તિગત ઉપકરણોને ટાર્ગેટ કરે છે.
આ ગંભીર સુરક્ષા જોખમને ધ્યાનમાં રાખીને ગૂગલે તમામ પ્રભાવિત યુઝર્સોને તાત્કાલિક અસરથી તેમના પાસવર્ડ બદલી નાખવા અને તમામ શંકાસ્પદ સક્રિય લોગિન સત્રો (Active Sessions) રદ કરવા માટે ભારપૂર્વક જણાવ્યું છે. કંપનીના પ્રવક્તાએ જણાવ્યું હતું કે યુઝર્સ અસરગ્રસ્ત ઉપકરણમાંથી માલવેર દૂર કરીને અને જૂના સત્રોને અમાન્ય કરીને પોતાના ડેટાને સુરક્ષિત કરી શકે છે. સુરક્ષા એજન્સીઓ પણ ચેપગ્રસ્ત કમ્પ્યુટર્સને તાત્કાલિક અલગ તારવીને સાવચેતી રાખવાની સલાહ આપી રહી છે.
આ ઘટનાએ ડિજિટલ સુરક્ષા સામે મોટા સવાલો ખડા કર્યા છે કારણ કે આનાથી બેંકિંગ એકાઉન્ટ્સ, સોશિયલ મીડિયા પ્રોફાઇલ્સ અને ગોપનીય ડેટા ચોરાવવાનું જોખમ અનેકગણું વધી ગયું છે. ભવિષ્યમાં આવા સાયબર હુમલાઓથી બચવા માટે ઓથેન્ટિકેશન સુરક્ષા વધુ મજબૂત બનાવવી અને અજાણી ફાઇલો કે લિંક્સથી દૂર રહેવું અનિવાર્ય બન્યું છે. સુરક્ષા સંશોધકો આ માલવેરના ફેલાવાની પદ્ધતિ પર વધુ અભ્યાસ કરી રહ્યા છે જેથી આગામી સમયમાં આવા જોખમોને જડમૂળથી નાબૂદ કરી શકાય.