જબલપુર તા.૨: મધ્યપ્રદેશના જબલપુર સ્થિત બરગી ડેમમાં આજે એક મોટી દુર્ઘટના ટળી હતી. પ્રવાસીઓને લઈને જઈ રહેલી એક ક્રૂઝ અચાનક ડેમના પાણીમાં પલટી જતા અફરાતફરી મચી ગઈ હતી. સદનસીબે સમયસર રેસ્ક્યૂ ઓપરેશન હાથ ધરાતા તમામ મુસાફરોને સુરક્ષિત બહાર કાઢી લેવાયા હતા.

ઘટના અંગે ક્રૂઝના કેપ્ટને ANI સાથેની વાતચીતમાં જણાવ્યું કે ક્રૂઝમાં ક્ષમતા મુજબ જ મુસાફરો હતા. અચાનક પાણીમાં સંતુલન બગડતા ક્રૂઝ એક તરફ નમી ગઈ અને જોતજોતામાં પલટી ગઈ હતી. કેપ્ટને કહ્યું કે ઘટના બાદ તરત જ તમામ મુસાફરોને લાઈફ જેકેટ પહેરાવી દેવામાં આવ્યા હતા, જેથી મોટી જાનહાનિ ટળી શકી. 

દુર્ઘટનાની જાણ થતાં જ ‘સુપર ટ્રૂપર્સ’ નામની રેસ્ક્યૂ બોટ તાત્કાલિક ઘટનાસ્થળે પહોંચી હતી. બોટ પર સવાર જવાનોએ પાણીમાં કૂદીને તમામ મુસાફરોને સુરક્ષિત રીતે બહાર કાઢ્યા હતા. ઘટનાના વિડિયોમાં પલટી ગયેલી ક્રૂઝ અને રેસ્ક્યૂ ઓપરેશન સ્પષ્ટ દેખાય છે. 

સ્થાનિક તંત્રએ ઘટનાની તપાસના આદેશ આપ્યા છે. પ્રાથમિક તપાસમાં ટેકનિકલ ખામી કે વધુ પડતા વજનને કારણે દુર્ઘટના સર્જાઈ હોવાની આશંકા છે. તંત્ર દ્વારા હવે ડેમમાં ચાલતી તમામ ક્રૂઝની સલામતી તપાસ હાથ ધરવામાં આવશે.