નવી દિલ્હી: ભારતના સામાન્ય નાગરિકો માટે ફરી એકવાર મોંઘવારીનો માર પડવાના એંધાણ વર્તાઈ રહ્યા છે. મિડલ ઈસ્ટ એટલે કે મધ્ય પૂર્વના દેશોમાં યુદ્ધ જેવી સ્થિતિ અને સતત વધી રહેલા ભૌગોલિક તણાવને પગલે આંતરરાષ્ટ્રીય માર્કેટમાં ક્રૂડ ઓઈલના ભાવમાં જોરદાર ઉછાળો જોવા મળી રહ્યો છે. 

ખાસ કરીને અમેરિકા અને ઈરાન વચ્ચે જે પ્રકારે શાબ્દિક યુદ્ધ અને આંતરિક ખેંચતાણ વધી રહી છે, તથા ઈઝરાયેલ દ્વારા સતત આપવામાં આવતી આક્રમક ધમકીઓને કારણે વૈશ્વિક ઓઈલ સપ્લાય ખોરવાઈ જવાની ભીતિ સેવાઈ રહી છે. 

આ તમામ પરિબળોને કારણે ક્રૂડના બેરલના ભાવ આસમાને પહોંચી રહ્યા છે. જો આંતરરાષ્ટ્રીય સ્તરે કાચા તેલના ભાવમાં આ જ રીતે વધારો થતો રહેશે, તો આગામી થોડા દિવસોમાં ભારતીય બજારમાં પણ પેટ્રોલ અને ડીઝલના ભાવમાં સારો એવો વધારો ઝીંકવામાં આવી શકે છે, જેની સીધી અસર જીવનજરૂરી ચીજવસ્તુઓના ટ્રાન્સપોર્ટેશન અને અંતે સામાન્ય માણસના ખિસ્સા પર પડશે. 

જોકે, આ વૈશ્વિક તણાવ વચ્ચે રશિયાના રાષ્ટ્રપતિ વ્લાદિમીર પુતિનનું એક નિવેદન પણ સામે આવ્યું છે, જેનાથી શેરબજાર અને ઓઈલ માર્કેટને થોડી રાહત જરૂર મળી છે. પુતિને રશિયન ઓઈલ સપ્લાય અકબંધ રાખવાનો અને પરિસ્થિતિ નિયંત્રણમાં રાખવાનો ઈશારો કર્યો છે. છતાં પણ જો મિડલ ઈસ્ટમાં કોઈ મોટી સૈન્ય કાર્યવાહી થશે તો પેટ્રોલ-ડીઝલના ભાવ ભડકે બળશે તે વાત નિશ્ચિત માનવામાં આવે છે. *