નવી દિલ્હી : વૈશ્વિક ઉર્જા બજાર માટે રાહતના મોટા સમાચાર સામે આવ્યા છે. ઈરાન દ્વારા હોર્મુઝની સામુદ્રધુની (Strait of Hormuz) તમામ વ્યાપારી જહાજો માટે ખુલ્લી મુકવાની જાહેરાત કરવામાં આવતા જ આંતરરાષ્ટ્રીય બજારમાં કાચા તેલના ભાવમાં મોટો ઘટાડો નોંધાયો છે. શુક્રવારે ક્રૂડ ઓઈલની કિંમતોમાં અંદાજે 13 ટકા જેટલો તીવ્ર ઘટાડો જોવા મળ્યો હતો, જે યુદ્ધના તણાવ વચ્ચે લાંબા સમય બાદ મળેલી સૌથી મોટી રાહત છે.

ભાવમાં 13 થી 14 ટકાનો મોટો ઘટાડો:

ઈરાનના વિદેશ મંત્રી અરાઘચીએ યુદ્ધવિરામ દરમિયાન જહાજોની અવરજવર શરૂ રાખવાના આપેલા નિવેદન બાદ બ્રેન્ટ ક્રૂડના વાયદાના ભાવ 12.87 ડોલર (અંદાજે 12.95 ટકા) ઘટીને 86.52 ડોલર પ્રતિ બેરલ પર આવી ગયા હતા. સત્ર દરમિયાન એક સમયે ભાવ 86.09 ડોલર સુધી પણ સરકી ગયા હતા. તેવી જ રીતે, અમેરિકન વેસ્ટ ટેક્સાસ ઇન્ટરમીડિયેટ (WTI) ક્રૂડના ભાવમાં 13.50 ડોલર (આશરે 14.26 ટકા) નો કડાકો જોવા મળ્યો હતો, જે 81.19 ડોલર પ્રતિ બેરલ પર પહોંચી ગયું હતું. ડોનાલ્ડ ટ્રમ્પે પણ પુષ્ટિ કરી છે કે ઈરાન ભવિષ્યમાં આ દરિયાઈ માર્ગને ક્યારેય બંધ ન કરવા માટે સહમત થયું છે.

નિષ્ણાતોનો અભિપ્રાય - હજુ અનિશ્ચિતતા યથાવત:

ઉર્જા સલાહકાર અલી અલ-રિયામીના જણાવ્યા અનુસાર, બજાર દ્વારા આ જાહેરાતને સકારાત્મક ગણવામાં આવી છે. જો આ વ્યવસ્થા કાયમી અને ઔપચારિક બનશે, તો તેલના ભાવમાં હજુ પણ 2 થી 3 ટકાનો વધુ ઘટાડો થવાની સંભાવના છે. જોકે, કન્ટેનર શિપિંગ લાઈન્સ એસોસિએશનના કાર્યકારી નિર્દેશક સુનીલ વાસવાનીનું માનવું છે કે શિપિંગ અને વીમા કંપનીઓ હજુ પણ 'વેઈટ એન્ડ વોચ' (થોભો અને રાહ જુઓ) ની નીતિ અપનાવી રહી છે. જ્યાં સુધી આ ક્ષેત્રમાં ફસાયેલા તેલ ટેન્કરો અને LPG કેરિયર્સ સુરક્ષિત રીતે પસાર ન થાય ત્યાં સુધી સંપૂર્ણ સામાન્ય સંચાલન શરૂ કરવામાં જોખમ હોઈ શકે છે.

પૂરવઠો સામાન્ય થવામાં લાગી શકે છે સમય:

UBS ના વિશ્લેષક જીઓવાન્ની સ્ટેઉનોવોએ જણાવ્યું છે કે ઈરાનના વલણમાં આવેલો આ ફેરફાર તણાવ ઘટાડવાના સંકેત આપે છે, પરંતુ વાસ્તવિકતા ત્યારે જ સ્પષ્ટ થશે જ્યારે હોર્મુઝમાંથી પસાર થતા ટેન્કરોની સંખ્યામાં નોંધપાત્ર વધારો જોવા મળશે. ઉલ્લેખનીય છે કે, કિંમતોમાં આટલો મોટો ઘટાડો થવા છતાં ભાવ હજુ પણ યુદ્ધ પહેલાના સ્તર કરતા થોડા ઊંચા છે. શિપિંગ ઉદ્યોગ હવે કોઈ ઠોસ અને લેખિત સમજૂતીની રાહ જોઈ રહ્યો છે જેથી પરિવહન ખર્ચ અને વીમાના દરોમાં પણ ઘટાડો થઈ શકે. જો આગામી દિવસોમાં સપ્લાય ચેઈન સંપૂર્ણપણે પૂર્વવત્ થશે, તો ભારત સહિતના આયાતકાર દેશોને મોટો આર્થિક ફાયદો થઈ શકે તેમ છે.