ન્‍યૂયોર્ક, તા.૨૭: સંયુક્‍ત રાષ્‍ટ્રમાં ભારતના કાયમી પ્રતિનિધિ એમ્‍બેસેડર પી. હરીશે પાકિસ્‍તાન દ્વારા કરવામાં આવેલી બિનજરૂરી અને ઉશ્‍કેરણીજનક ટિપ્‍પણીઓનો સણસણતો જવાબ આપતા સ્‍પષ્ટ કર્યું છે કે ભારત હવે આતંકવાદ સામે મૌન નહીં રહે. તેમણે કહ્યું કે, પાકિસ્‍તાન દ્વારા કરવામાં આવેલી પાયાવિહોણી ટિપ્‍પણીઓનો જવાબ આપવો અનિવાર્ય છે કારણ કે ભારત તથ્‍યોને વિશ્વ સમક્ષ સ્‍પષ્ટ કરવા માંગે છે. હરીશે ભારપૂર્વક જણાવ્‍યું કે સ્‍વતંત્રતા બાદથી જ ભારતે પાકિસ્‍તાન પ્રેરિત આતંકવાદનો સામનો કર્યો છે. ખાસ કરીને જમ્‍મુ-કાશ્‍મીરના સંદર્ભમાં તેમણે સ્‍પષ્ટ કર્યું કે તે ભારતનો અભિન્ન, કાયદેસર અને અટલ ભાગ છે અને રહેશે. પાકિસ્‍તાન જે રીતે આ -દેશો પર પોતાનો દાવો ઠોકી બેસાડવા માંગે છે તે સંપૂર્ણપણે ગેરકાયદેસર છે.

પાકિસ્‍તાનની દૂષિત નીતિઓ પર પ્રહાર કરતા ભારતીય પ્રતિનિધિએ ઉમેર્યું કે પાકિસ્‍તાને દાયકાઓથી બ્‍લીડ ઇન્‍ડિયા વિથ અ થાઉઝન્‍ડ કટ્‍સ (હજારો ઘા સાથે ભારતને લોહી વહેવડાવવું) ની સત્તાવાર નીતિ અપનાવી છે. તેમણે સુરક્ષા પરિષદમાં જણાવ્‍યું કે પાકિસ્‍તાને અનેક યુદ્ધો કરીને અને સતત સીમાપાર આતંકવાદને પ્રોત્‍સાહન આપીને સાર્વભૌમત્‍વ, પ્રાદેશિક અખંડિતતા અને શાંતિપૂર્ણ સહઅસ્‍તિત્‍વના તમામ આંતરરાષ્‍ટ્રીય સિદ્ધાંતોનું સરેઆમ ઉલ્લંઘન કર્યું છે. યુએન ચાર્ટર પ્રત્‍યેની પાકિસ્‍તાનની કટિબદ્ધતા માત્ર એક પોકળ દેખાવો છે, જેની પાછળ તે આતંકવાદના હથિયાર વડે લોકશાહી ભારતને નિશાન બનાવી રહ્યું છે.

છેલ્લે, ભારતે આંતરરાષ્‍ટ્રીય સમુદાયને સાક્ષી રાખીને પાકિસ્‍તાનને ગંભીર પરિણામોની ચેતવણી આપી છે. પી. હરીશે સ્‍પષ્ટ શબ્‍દોમાં કહ્યું કે ભારતને સીમાપારથી થતા કોઈપણ આતંકવાદી હુમલા સામે પોતાનો બચાવ કરવાનો અને વળતો જવાબ આપવાનો સંપૂર્ણ સાર્વભૌમ અધિકાર છે. તેમણે સલાહ આપી કે પાકિસ્‍તાને હવે આતંકવાદ, ધાર્મિક ઉગ્રવાદ અને ભારત વિરોધી પ્રચાર કરવાનું બંધ કરવું જોઈએ. પાકિસ્‍તાને એ સમજવું પડશે કે આતંકવાદને પ્રોત્‍સાહન આપવા માટે તેણે ભારે કિંમત ચૂકવવી પડશે. ભારતની આ કડક ભૂમિકા દર્શાવે છે કે નવી દિલ્‍હી હવે પાકિસ્‍તાન પ્રેરિત આતંકવાદ સામે ઝીરો ટોલરન્‍સની નીતિ પર અડગ છે.