નવી દિલ્હી : નેધરલેન્ડ્સમાં આવેલો આફ્સ્લૂટડાઇક  ડેમ એ માનવ ઈતિહાસનું એક એવું મેગાસ્ટ્રક્ચર છે જેણે કુદરતના નિયમોને પડકાર્યા છે. ૧૯૩૨માં તૈયાર થયેલી આ ૩૨ કિલોમીટર લાંબી દીવાલે ઉત્તર સમુદ્રના ખારા પાણીને રોકીને તેને 'ઇજસેલમીર' નામના મીઠા પાણીના વિશાળ તળાવમાં ફેરવી દીધું છે. એન્જિનિયરિંગની આ કમાલ માત્ર પાણીનો સંગ્રહ નથી કરતી, પરંતુ તેના ૯૦ મીટર પહોળા પ્લેટફોર્મ પરથી દેશનો વ્યસ્ત A7 હાઈવે પસાર થાય છે, જે બે મોટા પ્રાંતોને જોડે છે. પીએમ નરેન્દ્ર મોદીએ આ અજાયબીની મુલાકાત લઈ ભારત માટે તેને એક આદર્શ મોડેલ ગણાવ્યું છે.

આ ડેમની સૌથી મોટી ખાસિયત તેની સ્માર્ટ ડ્રેનેજ સિસ્ટમ અને ગ્રીન એનર્જીનો સમન્વય છે. જ્યારે અંદરના તળાવનું સ્તર વધે છે, ત્યારે અત્યાધુનિક પમ્પિંગ સ્ટેશનો અને સ્લુઇસ ગેટ્સ દ્વારા વધારાનું પાણી આપમેળે સમુદ્રમાં છોડી દેવાય છે. સમુદ્ર સપાટીથી નીચે વસેલા નેધરલેન્ડ્સ માટે આ ડેમ એક અભેદ્ય સુરક્ષા કવચ છે જે ચક્રવાત અને પૂરમાં દેશને ડૂબતો બચાવે છે. હવે આ પ્રોજેક્ટને સોલાર પેનલ્સ અને વિન્ડ ટર્બાઇનથી સજ્જ કરી ગ્રીન એનર્જીના હબ તરીકે વિકસાવવામાં આવી રહ્યો છે, જે ટકાઉ વિકાસનું શ્રેષ્ઠ ઉદાહરણ પૂરું પાડે છે.

વડાપ્રધાન મોદીએ આ ટેકનોલોજી ભારતમાં લાવવાની ખેવના વ્યક્ત કરી છે, જે ભારતના દરિયાકાંઠાના રાજ્યો માટે ગેમચેન્જર સાબિત થઈ શકે છે. ભારત આ મોડેલનો ઉપયોગ કરીને ચક્રવાતી પૂરને રોકવા, નદીઓને જોડવા અને કૃષિ ક્ષેત્રે સિંચાઈની નવી ક્ષિતિજો ખોલવા માંગે છે. ખાસ કરીને ગુજરાત અને મહારાષ્ટ્ર જેવા લાંબો દરિયાકાંઠો ધરાવતા રાજ્યોમાં જ્યાં મીઠા પાણીની તંગી છે, ત્યાં આવી 'સમુદ્રી દીવાલ' પાણીની સમસ્યાનો કાયમી ઉકેલ લાવી શકે છે.