વોશિંગ્ટન: યુએસ પ્રમુખ ડોનાલ્ડ ટ્રમ્પનું પ્રશાસન ભલે ઉપરથી ઇરાન અને મધ્ય-પૂર્વના મુદ્દે સંપૂર્ણ એકતાનો દાવો કરી રહ્યું હોય, પરંતુ પડદા પાછળની વાસ્તવિકતા કંઈક જુદી જ વાર્તા કહી રહી છે. છેલ્લા કેટલાક દિવસોમાં ઉપરાષ્ટ્રપતિ જે.ડી. વાન્સ અને વિદેશ સચિવ માર્કો રુબિયોના પરસ્પર વિરોધી નિવેદનોએ વ્હાઇટ હાઉસની આ કથિત એકતાના લીરેલીરા ઉડાડી દીધા છે. ખાસ કરીને લેબનોનની રાજધાની બેરૂતમાં ઇઝરાયલ દ્વારા નાગરિક માળખા પર કરવામાં આવેલા હુમલાઓ અંગે બંને નેતાઓ સહેજ પણ એકમત દેખાતા નથી. વાન્સે જ્યાં સ્પષ્ટ ચેતવણી આપી છે કે ઇઝરાયલની આક્રમકતા અમેરિકાના શાંતિ પ્રયાસોને રોળી નાખશે અને પ્રદેશમાં સળગતી આગમાં ઘી હોમવાનું કામ કરશે, ત્યાં બીજી તરફ માર્કો રુબિયોએ ગલ્ફ દેશોની ધરતી પર ઊભા રહીને ઇઝરાયલની આ લશ્કરી કાર્યવાહીને હિઝબુલ્લાહ સામેનો 'જરૂરી બચાવ' ગણાવીને તેનો ખુલ્લેઆમ પક્ષ લીધો છે.

બંને નેતાઓ વચ્ચેનો આ વિખવાદ તાજેતરમાં ૧૭ જૂનના રોજ અમેરિકા અને ઇરાન વચ્ચે થયેલા પ્રારંભિક શાંતિ કરારના બચાવ માટેના તેમના અલગ-અલગ વિદેશ પ્રવાસો દરમિયાન વધુ સપાટી પર આવ્યો હતો. સ્વિટ્ઝર્લૅન્ડ પહોંચેલા જે.ડી. વાન્સે ઇરાન પ્રત્યે અત્યંત નરમ અને સહકારી વલણ અપનાવતા પેન્ટાગોનના કતાર સ્થિત કોઓર્ડિનેશન સેન્ટરમાં એક ઇરાની ગુપ્તચર અધિકારીની નિમણૂક કરવાનો સનસનાટીભર્યો પ્રસ્તાવ મૂક્યો છે, એટલું જ નહીં, તેમણે ગલ્ફ દેશો દ્વારા ઇરાનના પુનર્નિર્માણ માટે આર્થિક મદદ કરવાની આશા પણ વ્યક્ત કરી છે. આનાથી તદ્દન વિપરીત, યુએઇ અને કુવૈતના પ્રવાસે ગયેલા માર્કો રુબિયોએ સાથી દેશોને કડક શબ્દોમાં ખાતરી આપી છે કે અમેરિકા કોઇપણ ભોગે પોતાના મિત્ર દેશોની સુરક્ષા સાથે સમજૂતી નહીં કરે. રુબિયોએ ઇરાનને ફંડિંગ આપવાની વાતને અત્યારથી જ ફગાવી દેતા સ્પષ્ટ કર્યું કે, "અમે સોદો ચોક્કસ ઇચ્છીએ છીએ, પણ કોઇપણ કિંમતે નહીં."

વ્હાઇટ હાઉસના પ્રવક્તા અન્ના કેલી અને સ્ટેટ ડિપાર્ટમેન્ટના ટોમી પિગોટે આ મતભેદોના અહેવાલોને 'બનાવટી અને ખોટા' ગણાવીને ડેમેજ કંટ્રોલ કરવાનો પૂરો પ્રયાસ કર્યો છે, પરંતુ વિદેશ નીતિના નિષ્ણાતો આ સરકારી દાવાઓને સ્વીકારવા તૈયાર નથી. અમેરિકન એન્ટરપ્રાઇઝ ઇન્સ્ટિટ્યૂટના માઈકલ રુબિન જેવા વિશ્લેષકોનું માનવું છે કે આ વિવાદ માત્ર વિદેશ નીતિ પૂરતો મર્યાદિત નથી, પરંતુ તે રિપબ્લિકન પાર્ટીની અંદર ચાલી રહેલા બે મોટા વૈચારિક પ્રવાહોનો ટકરાવ છે. એકતરફ જે.ડી. વાન્સ અમેરિકાને વિદેશી યુદ્ધોથી દૂર રાખવાની 'અમેરિકા ફર્સ્ટ' નીતિનું પ્રતિનિધિત્વ કરે છે, તો બીજી તરફ રુબિયો પરંપરાગત કડક વલણના પક્ષધર છે. રાજકીય પંડિતો આ ખેંચતાણને ૨૦૨૮ની રાષ્ટ્રપતિની ચૂંટણી માટે પક્ષની અંદર અત્યારથી જ શરૂ થઇ ગયેલા પાવર-પ્લે અને વર્ચસ્વની લડાઈ તરીકે જોઈ રહ્યા છે.