લંડન : બ્રિટનમાં લાંબા સમયથી રોજિંદા જીવનમાંથી અદૃશ્ય થઈ ગયેલો કોવિડ વાયરસ ફરી એકવાર સક્રિય થઈ ગયો છે અને 'મને લાગે છે કે મને કોવિડ થયો છે' તેવું વાક્ય ફરીથી લોકોની વાતોમાં ગુંજવા લાગ્યું છે. યુકે હેલ્થ સિક્યુરિટી એજન્સી (યુકેએચએસએ) ના તાજેતરના આંકડા મુજબ કોવિડ સંબંધિત હોસ્પિટલમાં પ્રવેશમાં એક જ અઠવાડિયામાં અંદાજે ૫૦ ટકાનો મોટો વધારો થયો છે, જ્યારે પોઝિટિવ ટેસ્ટનું પ્રમાણ ૫.૯ ટકાથી વધીને ૭ ટકા સુધી પહોંચી ગયું છે.

આ વાયરસનો પ્રકોપ લંડનમાં સૌથી વધુ આક્રમક જોવા મળી રહ્યો છે, જ્યાં માત્ર સાત દિવસમાં જ હોસ્પિટલમાં દાખલ થનારા દર્દીઓની સંખ્યામાં આશરે ૮૦ ટકાનો તીવ્ર ઉછાળો નોંધાયો છે. સૌથી સંવેદનશીલ ગણાતા ૮૫ વર્ષથી વધુ ઉંમરના વૃદ્ધોમાં આ દર દર ૧૦૦,૦૦૦ ના વસ્તી દીઠ ૭.૦૮ થી વધીને સીધો ૧૨.૪૩ પર પહોંચી ગયો છે. જો કે, આજકાલ મોટાભાગના લોકો કોવિડનું પરીક્ષણ કરાવવાનું ટાળતા હોવાથી ચેપનું વાસ્તવિક પ્રમાણ આંકડાઓ કરતા ઘણું વધારે હોઈ શકે છે તેવી આશંકા વ્યક્ત કરવામાં આવી રહી છે.
પાંચ વર્ષ પહેલાં રોગચાળાના સૌથી ભયાનક દિવસોમાં હોસ્પિટલો દર્દીઓથી ઉભરાઈ ગઈ હતી અને સેંકડો લોકોના મોત થઈ રહ્યા હતા, તેવી ભયાવહ સ્થિતિ હાલ નથી અને લક્ષણો પણ પ્રમાણમાં વધુ નિયંત્રિત છે. છતાં પણ અચાનક વધેલા આંકડાઓએ સામાન્ય લોકોની સાથે સાથે તબીબો અને વાયરસ નિષ્ણાતોની ચિંતાઓને ફરીથી તાજી કરી દીધી છે કે શું આ કોઈ નવા મોટા ખતરાની શરૂઆત તો નથી ને.
આ પરિસ્થિતિને ધ્યાનમાં રાખીને આરોગ્ય નિષ્ણાતો દ્વારા સાવચેતી રાખવા પર ભાર મૂકવામાં આવી રહ્યો છે અને ભૂતકાળના અનુભવોમાંથી શીખીને હોસ્પિટલો અને સંવેદનશીલ જૂથો માટે આગામી દિવસોમાં વિશેષ તકેદારીના પગલાં લેવાય તેવી સંભાવના છે.