મદુરાઈ : સોશિયલ મીડિયા પર લાઈક્સ, કમેન્ટ્સ અને ફોલોઅર્સ મેળવવા માટે પોતાની અંગત જિંદગી અને સંપત્તિનું પ્રદર્શન કરવાનો શોખ એક સોશિયલ મીડિયા ઈન્ફ્લુએન્સર માટે ખૂબ જ મોંઘો સાબિત થયો છે. તામિલનાડુના મદુરાઈમાં એક મહિલા ઈન્ફ્લુએન્સરે પોતાના ઈન્સ્ટાગ્રામ એકાઉન્ટ પર ઘરની તિજોરીમાં રાખેલું સોનું અને મોટી માત્રામાં રોકડ રકમ દર્શાવતી રીલ્સ અને વિડીયો પોસ્ટ કર્યા હતા. આ વીડિયો સોશિયલ મીડિયા પર વાયરલ થતાં જ સાતિર તસ્કરોના ધ્યાને ચડી ગયો હતો, અને તકો જોઈને ચોરોએ તેના ઘર પર હાથસાફ કરીને લાખો રૂપિયાનો મુદ્દામાલ પાર કરી દીધો હતો.

મળતી વિગતો અનુસાર, પીડિત મહિલા અવારનવાર ઈન્સ્ટાગ્રામ પર પોતાની લક્ઝરિયસ લાઈફસ્ટાઈલ, કિંમતી સોનાના દાગીના અને રોકડ રકમના પ્રદર્શનવાળા વિડીયો અપલોડ કરતી હતી. ચોરોએ આ વીડિયોના આધારે તેના ઘરનું લોકેશન અને નજર કેદ રાખીને પ્લાન ઘડ્યો હતો. પરિવારજનો જ્યારે બહાર ગયા હતા ત્યારે ચોરોએ ઘરમાં ઘૂસીને તિજોરીમાંથી લાખો રૂપિયાની કિંમતના સોનાના ઘરેણાં અને રોકડ રકમ ચોરી લીધી હતી.

પોલીસે તપાસનો ધમધમાટ શરૂ કર્યો, સોશિયલ મીડિયા વાપરનારાઓ માટે લાલબત્તી સમો કિસ્સો

ઘરે પરત ફરતાં જ ચોરી થયાની જાણ થતાં મહિલા અને તેના પરિવારે તાત્કાલિક સ્થાનિક પોલીસ સ્ટેશનમાં ફરિયાદ નોંધાવી હતી. ઘટનાની ગંભીરતાને ધ્યાને લઈને પોલીસે ચોરીનો ગુનો નોંધી, આસપાસના સીસીટીવી ફુટેજ તેમજ સોશિયલ મીડિયા એકાઉન્ટના ડેટા આધારે તસ્કરોનું સુરાગ મેળવવા તપાસ હાથ ધરી છે. આ ઘટનાએ સોશિયલ મીડિયા પર પોતાની અંગત મિલકતોનું પ્રદર્શન કરતા લોકો માટે એક લાલબત્તી સમાન ચેતવણી પૂરી પાડી છે.