ઇટાવા, તા.૨૩: સમાજવાદી પાર્ટી (સપા) ની અંદર ચાલી રહેલો આંતરિક વિવાદ હવે ખુલ્લેઆમ સપાટી પર આવી ગયો છે. સપાના રાષ્ટ્રીય પ્રવક્તા રાજકુમાર ભાટીના એક વિવાદાસ્પદ વાયરલ વીડિયોને લઈને પાર્ટીમાં ભારે નારાજગી જોવા મળી રહી છે. ઉત્તર પ્રદેશના ઇટાવા ખાતે એમએલસી (MLC) ચૂંટણીમાં મતદાન કર્યા બાદ સપાના રાષ્ટ્રીય મહાસચિવ અને રાજ્યસભા સાંસદ પ્રો. રામગોપાલ યાદવે મીડિયા સમક્ષ સ્પષ્ટ શબ્દોમાં અલ્ટીમેટમ આપ્યું છે કે જો રાજકુમાર ભાટી પોતાના વર્તનમાં સુધારો નહીં કરે અને આવા વિવાદાસ્પદ નિવેદનો આપવાનું બંધ નહીં કરે, તો તેમને તાત્કાલિક ધોરણે પ્રવક્તા પદ પરથી હટાવી દેવામાં આવશે.

રામગોપાલ યાદવે પત્રકારો સાથે વાતચીત કરતા જણાવ્યું હતું કે રાજકુમાર ભાટી દ્વારા આપવામાં આવેલું નિવેદન તદ્દન વ્યક્તિગત હતું અને સપા પાર્ટી તેનાથી કોઈ સંબંધ ધરાવતી નથી તેમજ પક્ષ આવા નિવેદનોનો સખત વિરોધ કરે છે. નેતાઓએ સાર્વજનિક મંચ પરથી સાવચેતી રાખવી જરૂરી છે. ઉલ્લેખનીય છે કે તાજેતરમાં સોશિયલ મીડિયા પર રાજકુમાર ભાટીનો એક વીડિયો ભારે વાયરલ થયો હતો, જેમાં તેઓ કેટલાક લોકો સાથે સ્ટેજ પર હિન્દુ દેવતાઓમાં વિશ્વાસ ન રાખવાની પ્રતિજ્ઞા લેતા નજરે પડ્યા હતા. આ વીડિયો વાયરલ થયા બાદ સોશિયલ મીડિયા પર એવા દાવાઓ કરવામાં આવ્યા હતા કે ભાટીએ હિન્દુ ધર્મ છોડીને બૌદ્ધ ધર્મ અંગીકાર કર્યો છે, જેના કારણે રાજકીય ગરમાવો આવી ગયો હતો.

આ ભારે વિવાદ અને પાર્ટીના શીર્ષ નેતૃત્વ તરફથી ફટકાર મળ્યા બાદ સપા પ્રવક્તા રાજકુમાર ભાટીએ ખુલાસો કરતા સ્પષ્ટતા કરી હતી કે તેમણે પોતાનો ધર્મ બદલ્યો નથી અને ભવિષ્યમાં પણ એવો કોઈ ઈરાદો નથી. તેમણે દાવો કર્યો હતો કે વિરોધીઓ અને ભાજપ તેમને રાજકીય રીતે બદનામ કરવા માટે સોશિયલ મીડિયા પર એડિટ કરેલા વીડિયોની મદદથી ભ્રામક ઝુંબેશ ચલાવી રહ્યા છે. હિન્દુ ધર્મને અત્યંત ઉદાર ધર્મ ગણાવતા તેમણે કહ્યું કે તેઓ દરેક ધર્મ અને સંસ્કૃતિનું સન્માન કરે છે.

પોતાના બચાવમાં સ્પષ્ટતા કરતા ભાટીએ જણાવ્યું હતું કે તેઓ ગત ૨૦ ઓક્ટોબરના રોજ દિલ્હીના રાણી ઝાંસી રોડ પર આવેલા આંબેડકર ભવનમાં 'ભારતીય બૌદ્ધ મહાસભા' દ્વારા આયોજિત એક કાર્યક્રમમાં મુખ્ય અતિથિ તરીકે આમંત્રિત થયા હતા અને એક સાચા સમાજવાદી તરીકે તેઓ તમામ ધર્મો અને સામાજિક સમુદાયોના આદરાર્થે આવા કાર્યક્રમોમાં હાજરી આપતા હોય છે.

આ સમગ્ર વિવાદે ઉત્તર પ્રદેશના રાજકારણમાં નવો રંગ ભરી દીધો છે. એક તરફ જ્યાં વિપક્ષી ભાજપ સપા પર નિશાન સાધી રહી છે, તો બીજી તરફ પાર્ટીના પોતાના જ વરિષ્ઠ નેતા રામગોપાલ યાદવ દ્વારા જાહેરમાં અપાયેલી કડક ચેતવણીએ સ્પષ્ટ કરી દીધું છે કે સમાજવાદી પાર્ટી આવા ધાર્મિક કે વિવાદાસ્પદ મુદ્દાઓ પર કોઈ જ ઢીલાશ દાખવવાના મૂડમાં નથી. આગામી સમયમાં આ મામલો સપાની આંતરિક રાજનીતિમાં કેવું વળાંક લાવે છે તેના પર સૌની નજર રહેશે.