એટા : ઉત્તર પ્રદેશના એટા જિલ્લામાંથી એક અત્યંત ચોંકાવનારી અને હૃદયદ્રાવક ઘટના સામે આવી છે, જ્યાં જયથરા પોલીસ સ્ટેશન વિસ્તારના ઢાકપુરા ગામમાં શનિવારે રાત્રે ૧૨:૩૦ વાગ્યે ખેતરમાં પાઇપલાઇન નાખવાના મામૂલી વિવાદમાં અડધો ડઝન જેટલા શખ્સોએ હિંસક બનીને આડેધડ ગોળીબાર કર્યો હતો, જેમાં એક ૧૪ વર્ષીય નિર્દોષ સગીરની આંખમાં ગોળી વાગવાથી તે ગંભીર રીતે ઘાયલ થયો હતો.

પ્રાપ્ત વિગતો અનુસાર, ઢાકપુરા ગામના રહેવાસી અમિતે પોતાના ખેતરની સિંચાઈ કરવા માટે આરોપીઓના ખેતરની બાજુમાંથી પાણીની પાઇપલાઇન પસાર કરી હતી. આ વાતને લઈને શનિવારે સાંજે જંડૈલ સિંહ, સત્યરામ, ધીરજ, મુરલીધર અને ઓમસરન સહિતના અડધો ડઝન લોકોએ ભેગા થઈને ઉગ્ર બોલાચાલી અને ઝઘડો કરવાનું શરૂ કરી દીધું હતું.

આ વિવાદ એટલો હદ સુધી વધી ગયો કે રાત્રે ૧૨:૩૦ વાગ્યાના સુમારે મામલો લોહિયાળ હિંસામાં ફેરવાઈ ગયો અને હુમલાખોરોએ ફાયરિંગ શરૂ કરી દીધું હતું. આ અંધાધૂંધ ગોળીબાર દરમિયાન ત્યાં હાજર ૧૪ વર્ષના સગીરની આંખમાં અચાનક ગોળી વાગતા તે લોહીલુહાણ થઈને જમીન પર ફસડાઈ પડ્યો હતો, જેને તાત્કાલિક ધોરણે મેડિકલ કોલેજ ખાતે ખસેડવામાં આવ્યો હતો.

ઘટનાની ગંભીરતાને જોઈને સ્થાનિક ગ્રામવાસીઓએ તાત્કાલિક ડાયલ ૧૧૨ પર ફોન કરીને પોલીસને જાણ કરી હતી, જેના પગલે પોલીસ કાફલો તાત્કાલિક ઘટનાસ્થળે દોડી આવ્યો હતો પરંતુ આરોપીઓ અંધારાનો લાભ લઈને નાસી છૂટવામાં સફળ રહ્યા હતા. હાલ પોલીસ દ્વારા તમામ ફરાર આરોપીઓની સઘન શોધખોળ ચલાવવામાં આવી રહી છે અને સગીરની ગંભીર સ્થિતિને જોતા તેને ઉચ્ચ કેન્દ્રની હોસ્પિટલમાં વધુ સારવાર માટે રિફર કરાયો છે.