ડેનવર, તા.30: અમેરિકાના કોલોરાડો રાજ્યમાંથી એક અત્યંત હૃદયદ્રાવક અને આંખમાં પાણી લાવી દે તેવી ઘટના સામે આવી છે. અહીં માઉન્ટ બ્લુ સ્કાયના પર્વતીય શિખર પર હાઇકિંગ કરી રહેલા એક 15 વર્ષીય કિશોરનું અચાનક આકાશી વીજળી પડવાથી કરુણ મૃત્યુ પામ્યું છે. જો કે, આ દુર્ઘટનામાં સૌથી પ્રેરણાદાયી અને ગદગદ કરી દે તેવી વાત એ છે કે આ કિશોરે પોતાની અંતિમ ક્ષણો પોતાના નાના ભાઈના રક્ષણ પાછળ વિતાવી હતી.
પ્રાપ્ત વિગતો અનુસાર, ક્લિયર ક્રીક કાઉન્ટી શેરિફ ઓફિસે આપેલી માહિતી મુજબ 15 વર્ષીય લેવી સ્ટ્રોબેલ નામના કિશોરે અન્ય ચાર હાઇકર્સ સાથે આશરે 14,000 ફૂટની માતબર ઊંચાઈ ધરાવતા માઉન્ટ બ્લુ સ્કાય પર્વત પર ચઢાણ શરૂ કર્યું હતું. રવિવારે બપોરે અચાનક વાતાવરણ બદલાયું અને આકાશમાં ઘેરા તોફાની વાદળો ઘેરાઈ ગયા. તે જ સમયે અચાનક ત્રાટકેલી ઘાતક વીજળી સીધી લેવી પર પડી હતી. આ ભયાનક આફતમાં લેવીનું ઘટનાસ્થળે જ કમનસીબ મોત નીપજ્યું હતું, જ્યારે તેનો 13 વર્ષીય નાનો ભાઈ જેસ ગંભીર રીતે ઘાયલ થયો હતો.
ઘટનાની જાણ થતાં જ તાત્કાલિક રાહત અને બચાવ કામગીરી શરૂ કરવામાં આવી હતી. ગંભીર રીતે ઘાયલ થયેલા નાના ભાઈ જેસને એરલિફ્ટ કરીને ડેનવરની હોસ્પિટલમાં ખસેડવામાં આવ્યો હતો, જ્યાં ડૉક્ટરોના સઘન પ્રયાસો બાદ હવે તેની તબિયતમાં ક્રમશઃ સુધારો થઈ રહ્યો છે. આ દુર્ઘટનામાં અન્ય બે પુખ્ત વયના હાઇકર્સને પણ સામાન્ય ઈજાઓ પહોંચી હતી પરંતુ તેમને હોસ્પિટલમાં દાખલ કરવા પડે તેવી સ્થિતિ નહોતી.
શોકમાં ડૂબેલે સ્ટ્રોબેલ પરિવારે પોતાના વ્હાલસોયા પુત્રની બહાદુરીને યાદ કરતા જણાવ્યું હતું કે, "પોતાની અંતિમ ક્ષણોમાં પણ લેવીએ અસાધારણ હિંમત અને નિઃસ્વાર્થ ભાવના દાખવી હતી. તેણે પર્વત પર મુશ્કેલીમાં મુકાયેલા પોતાના નાના ભાઈને બચાવવાનો ભરપૂર પ્રયાસ કર્યો હતો. તે એક અત્યંત પ્રેમાળ અને બહાદુર ભાઈ હતો." પરિવારે ઈસુ ખ્રિસ્તમાં શ્રદ્ધા રાખીને આ મુશ્કેલ સમયમાં હિંમત જાળવી રાખી છે, જ્યારે ઘાયલ નાના ભાઈના સ્વાસ્થ્ય માટે મિત્રોએ 'ગોફંડમી' પેજ દ્વારા આર્થિક સહાય પણ એકત્ર કરી છે.
હવામાન વિભાગના અહેવાલ મુજબ, આ દુર્ઘટના બની તે સમયે તે વિસ્તારમાં આશરે 19 જેટલી વીજળી પડવાની ઘટનાઓ નોંધાઈ હતી. નેશનલ લાઈટનિંગ સેફ્ટી કાઉન્સિલના આંકડા મુજબ, ચાલુ વર્ષે યુએસમાં વીજળી પડવાથી મૃત્યુ પામનારો લેવી છઠ્ઠો વ્યક્તિ છે. કુદરતના આ ક્રોધે એક હસતો-રમતો પરિવાર છિન્નભિન્ન કરી નાખ્યો છે, અને આ ઘટના સમગ્ર અમેરિકામાં ચર્ચાનો વિષય બની છે.