​નવી દિલ્હી:કોકરોચ જનતા પાર્ટી (CJP) ના સંસ્થાપક અભિજીત દિપકેને શનિવારે એક અદાલત દ્વારા શરતી જામીન મંજૂર કરવામાં આવ્યા છે. દિલ્હીના કનોટ પ્લેસ તરફ જતી વેળાએ તેમની અટકાયત કરવામાં આવી હતી અને ત્યારબાદ તેમની ધરપકડ કરવામાં આવી હતી. જામીન આપતી વખતે અદાલતે મુખ્ય શરત મૂકી છે કે તેમણે આગામી એક વર્ષ સુધી કોઈપણ પ્રકારની શાંતિભંગની ગતિવિધિથી દૂર રહેવું પડશે અને શાંતિ જાળવવી પડશે.

​પ્રાપ્ત વિગતો અનુસાર, અભિજીત દિપકેને શનિવારે મંદિર માર્ગ સ્થિત સ્પેશિયલ એક્ઝિક્યુટિવ મેજિસ્ટ્રેટ સમક્ષ રજૂ કરવામાં આવ્યા હતા, જ્યાં તેમને શરતી જામીન બોન્ડ પર મુક્ત કરવામાં આવ્યા છે.

​શું હતો સમગ્ર મામલો?

અભિજીત દિપકે દ્વારા શુક્રવારે સાંજે 5:00 વાગ્યે 'હેરા દો તિરંગા' માર્ચ કાઢવાની જાહેરાત કરવામાં આવી હતી. આ માર્ચમાં સામેલ ન થવા માટે દિલ્હી પોલીસ દ્વારા તેમને થોડા કલાકો અગાઉ જ નોટિસ ફટકારવામાં આવી હતી. નોટિસની અવગણના કરીને ડિપકે શુક્રવારે સાંજે કનોટ પ્લેસ જવા માટે રવાના થયા હતા, જ્યાંથી પોલીસ દ્વારા તેમની અટકાયત કરવામાં આવી હતી. આ ઉપરાંત, મંડી હાઉસ પાસેથી આઈસા (AISA) ના કાર્યકર નેહા બોરાની પણ અટકાયત કરવામાં આવી હતી.

​અહેવાલ મુજબ, ગત 10 ઓક્ટોબરે ભરપાઈ કરવામાં આવેલા શાંતિ બોન્ડનું ઉલ્લંઘન કરવાના આરોપસર દિપકેની શનિવારે સવારે ધરપકડ દર્શાવવામાં આવી હતી.

​બીજી તરફ, આ સમગ્ર ઘટનાક્રમમાં સૌરવ દાસ અને આશુતોષ રાંકા હજુ પણ કસ્ટડીમાં હોવાનું જાણવા મળ્યું છે. કોર્ટે જામીન મંજૂર કરતી વેળાએ સ્પષ્ટ કર્યું છે કે દિપકેએ શાંતિ જાળવવાની શરતનું સખતપણે પાલન કરવાનું રહેશે.