નવી દિલ્હી, તા. 25 મે, 2026 સુપ્રીમ કોર્ટના કોરિડોરમાં આજે એક અનોખો અને ચર્ચાસ્પદ મામલો પહોંચ્યો હતો. 'કોકરોચ જનતા પાર્ટી' નામના સોશિયલ મીડિયા અભિયાન અને તે દ્વારા ફેલાવવામાં આવતા વ્યંગ સામે દાખલ થયેલી એક જનહિત અરજી (PIL) પર સુનાવણી દરમિયાન મુખ્ય ન્યાયાધીશ (CJI) સૂર્યકાંતે અરજદાર વકીલને ઠંડા કલેજે કામ લેવાની સલાહ આપી હતી. કોર્ટરૂમમાં ગરમાગરમીના માહોલ વચ્ચે સીજેઆઈએ સ્પષ્ટ કર્યું હતું કે, આ મામલે ઉતાવળમાં કોઈ પણ આદેશ પસાર કરવાની તાકીદ નથી અને કોર્ટ ભવિષ્યમાં આ અરજીની ઊંડાણપૂર્વક તપાસ કરશે.
શું છે આ 'કોકરોચ' વિવાદ?
આ સમગ્ર વિવાદની શરૂઆત ત્યારે થઈ હતી જ્યારે ન્યાયતંત્રમાં નકલી ડિગ્રીઓ અને બનાવટી વકીલોના પ્રવેશ અંગે સીજેઆઈ દ્વારા કરવામાં આવેલી ટિપ્પણીને સોશિયલ મીડિયા પર સંદર્ભની બહાર રજૂ કરવામાં આવી હતી. આ નિવેદનને મુદ્દો બનાવીને 'કોકરોચ જનતા પાર્ટી' નામના પ્લેટફોર્મે તીક્ષ્ણ વ્યંગ શરૂ કર્યો હતો. અરજદારનો આક્ષેપ છે કે, આ પ્લેટફોર્મ જાણીજોઈને ન્યાયતંત્રની પ્રતિષ્ઠાને નુકસાન પહોંચાડી રહ્યું છે અને ખોટી વાર્તાઓ ફેલાવી રહ્યું છે. આ અરજીમાં ન્યાયિક ચર્ચાઓના વ્યાપારીકરણને રોકવા અને નકલી ડિગ્રીઓની CBI તપાસની માંગ કરવામાં આવી છે.
ડિજિટલ વ્યંગ કે યુવા અસંતોષનો અવાજ?
શરૂઆતમાં માત્ર હળવા મજાક અને મીમ્સ તરીકે શરૂ થયેલી 'કોકરોચ જનતા પાર્ટી' આજે દેશના લાખો યુવાનોના અસંતોષનું માધ્યમ બની ગઈ છે. બેરોજગારી, પરીક્ષા પેપર લીક અને શિક્ષણ વ્યવસ્થાની ખામીઓ સામે આ એક મોટું ડિજિટલ આંદોલન બનીને ઉભરી આવ્યું છે. ઇન્સ્ટાગ્રામ પર ૨૨ મિલિયનથી વધુ ફોલોઅર્સ ધરાવતું આ જૂથ હાલમાં NEET-UG 2026 ના વિવાદ બાદ કેન્દ્રીય શિક્ષણ મંત્રીના રાજીનામાની માંગ કરી રહ્યું છે.
સરકાર અને આંદોલન વચ્ચેના ઘર્ષણના એંધાણ
ગયા શનિવારે જ્યારે આ આંદોલનની સત્તાવાર વેબસાઇટ અચાનક બંધ થઈ ગઈ, ત્યારે સ્થાપક અભિજીત દિપકેએ કેન્દ્ર સરકાર પર સરમુખત્યારશાહીનો આરોપ લગાવ્યો હતો. તેમણે દાવો કર્યો હતો કે આ અભિયાન ચલાવવા બદલ તેમને જાનથી મારી નાખવાની ધમકીઓ મળી રહી છે. એક તરફ જ્યાં સરકાર ન્યાયતંત્રની ગરિમા જાળવવા કડક પગલાં લેવાની તરફેણમાં છે, તો બીજી તરફ યુવાનો આ ડિજિટલ અભિવ્યક્તિને દબાવવાનો પ્રયાસ ગણાવી રહ્યા છે.
સુપ્રીમ કોર્ટે હાલમાં આ મામલે ત્વરિત કાર્યવાહી કરવાનો ઇનકાર કર્યો છે, પરંતુ આગામી દિવસોમાં CBI તપાસની માંગ અને આ ઓનલાઈન આંદોલન પરની કાનૂની પકડ દેશના રાજકીય અને સામાજિક વર્તુળોમાં મોટી ચર્ચાનો વિષય બની રહેશે.