નવી દિલ્હી : દિલ્હીના જંતર મંતર ખાતે છેલ્લા એક મહિનાથી ચાલી રહેલું ચર્ચિત વિદ્યાર્થી આંદોલન શનિવારે કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામા સાથે જ સમાપ્ત થઈ ગયું છે. કોકરોચ જનતા પાર્ટી (CJP) ની આગેવાની હેઠળ ચાલી રહેલા આ આંદોલનમાં સરકારે પ્રધાનના રાજીનામા સહિતની તમામ માંગણીઓ સ્વીકારી લીધી છે. પરંતુ સૌથી મોટો સવાલ એ ઊભો થાય છે કે ૨૪ કલાક પહેલાં જ સરકાર જે રાજીનામું આપવાનો સાફ ઇનકાર કરતી હતી, તે અચાનક રાજીનામું લેવા માટે કેવી રીતે તૈયાર થઈ ગઈ? આ પાછળ CJP નું ૭૨ કલાકનું એક આક્રમક અલ્ટીમેટમ મુખ્ય કારણ હોવાનું સામે આવ્યું છે.

સૂત્રોના જણાવ્યા અનુસાર, ૨૦ જુલાઈના રોજ CJP એ સંસદ તરફ કૂચનું આહ્વાન કર્યું હતું, જેમાં દેશભરમાંથી હજારો વિદ્યાર્થીઓ અચાનક દિલ્હીના અતિ સુરક્ષિત વિસ્તારમાં ઉમટી પડ્યા હતા. આ ઘટનાથી સરકાર એલર્ટ થઈ ગઈ હતી. ત્યારબાદ શુક્રવારે CJP ના પ્રવક્તા સૌરવ દાસ અને આશુતોષ રંકાએ કેન્દ્રીય મંત્રીઓ જે.પી. નડ્ડા અને જિતેન્દ્ર સિંહ સાથે બંધ બારણે બેઠક કરી હતી. આ બેઠકમાં સરકારે અન્ય માંગણીઓ સ્વીકારી હતી પરંતુ ધર્મેન્દ્ર પ્રધાનના રાજીનામા અંગે સમય માગ્યો હતો. ત્યારે CJP ના પ્રતિનિધિઓએ સ્પષ્ટ શબ્દોમાં ૭૨ કલાકનું અલ્ટીમેટમ આપતા કહ્યું કે જો રાજીનામું નહીં લેવાય તો ફરીથી સંસદનો ઘેરાવ કરવામાં આવશે.

સરકારને અંદાજ આવી ગયો હતો કે જો વિદ્યાર્થીઓ ફરીથી શેરીઓમાં ઉતરશે તો સ્થિતિ વધુ વણસી શકે છે. ઉચ્ચ સ્તરે થયેલી ગંભીર ચર્ચાઓ બાદ આખરે ધર્મેન્દ્ર પ્રધાનનો બલિદાન આપવાનો નિર્ણય લેવાયો. વડાપ્રધાન મોદીના કાર્યકાળ દરમિયાન જાહેર વિવાદ અને વિરોધ બાદ રાજીનામું આપનારા ધર્મેન્દ્ર પ્રધાન બીજા કેન્દ્રીય મંત્રી બન્યા છે; આ પહેલાં ૨૦૧૮ માં #MeToo વિવાદ બાદ એમ.જે. અકબરે રાજીનામું આપવું પડ્યું હતું. AAP ના પૂર્વ પદાધિકારી અભિજીત દીપક દ્વારા સ્થાપિત CJP ના આ સફળ આંદોલને દેશના રાજકારણમાં એક નવો ઈતિહાસ રચી દીધો છે.