નવી દિલ્હી:  કનોટ પ્લેસમાં તિરંગા યાત્રાનું આયોજન કરવાના વિવાદમાં દિલ્હી પોલીસ દ્વારા નિવારક કસ્ટડીમાં લેવાયેલા કોકરોચ જનતા પાર્ટી (CJP) ના નેતા અભિજીત દીપકને ૨૪ કલાકથી પણ ઓછા સમયમાં શનિવારે ચોક્કસ શરતો સાથે જામીન પર મુક્ત કરવામાં આવ્યા છે. જેલમાંથી બહાર આવ્યા બાદ અભિજીત દીપકે સોશિયલ મીડિયા પર બોલિવૂડ અભિનેતા શાહરૂખ ખાનની સુપરહિટ ફિલ્મ "વીર-ઝારા" ના જેલ વાળા લુકની તસવીર શેર કરીને એક રમુજી પોસ્ટ કરી હતી. તેમણે કેપ્શનમાં લખ્યું હતું કે, "૨૪ કલાક વાઇફાઇ અને ફોન વિના રહ્યા પછી જેલની બહાર આવવાનું કેવું લાગે છે?" તેમની આ પોસ્ટે ડિજિટલ મીડિયા પર ભારે આકર્ષણ જમાવ્યું છે.

અભિજીત દીપકની અટકાયત અંગેની વિગતો આપતા દિલ્હી પોલીસે સમાચાર એજન્સી ANI ને જણાવ્યું હતું કે દીપકને શાંતિ બોન્ડ પર હસ્તાક્ષર કર્યા બાદ મુક્ત કરવામાં આવ્યા છે. શાંતિ બોન્ડ એ એક કાયદાકીય બાંયધરી છે, જેમાં સંબંધિત વ્યક્તિએ વિસ્તારમાં શાંતિ જાળવવાનું અને પોલીસ દ્વારા લાદવામાં આવેલી શરતોનું ચુસ્તપણે પાલન કરવાનું વચન આપવાનું હોય છે. ઉલ્લેખનીય છે કે, કનોટ પ્લેસમાં કલમ ૧૬૩ લાગુ હોવા છતાં વિરોધ પ્રદર્શન અને કૂચનું આયોજન કરવામાં આવી રહ્યું હતું, જેના કારણે પોલીસે આ આકરાં પગલાં ભર્યાં હતાં.

પોલીસ કાર્યવાહીની વિગત મુજબ, અભિજીત દીપક જ્યારે NCP-SCP ના પ્રવક્તા અનિશ ગાવંડેના ઘરેથી કનોટ પ્લેસમાં તિરંગા માર્ચમાં ભાગ લેવા નીકળ્યા ત્યારે જ તેમની અટકાયત કરવામાં આવી હતી. અટકાયત પહેલાં ૧૦ થી વધુ પોલીસકર્મીઓ તેમના નિવાસસ્થાને પહોંચ્યા હતા અને કનોટ પ્લેસમાં ટ્રાફિક જામ, જાહેર સલામતી તેમજ વેપાર-રોજગારમાં વિક્ષેપ પડવાની શક્યતા દર્શાવીને વિરોધ ન કરવા વિનંતી કરી હતી. પોલીસ અધિકારીએ તેમને સ્પષ્ટ જણાવ્યું હતું કે કનોટ પ્લેસમાં કલમ ૧૬૩ લાગુ હોવાથી તેમની નિવારક અટકાયત કરવામાં આવી રહી છે.