નવી દિલ્હી :  ભારતના મુખ્ય ન્યાયાધીશ સૂર્યકાંત દ્વારા દેશના વિકાસ પ્રોજેક્ટ્સ અને પર્યાવરણવાદીઓ અંગે કરવામાં આવેલી એક આકરી ટિપ્પણીએ દેશભરમાં મોટો વૈચારિક અને કાનૂની સંગ્રામ જગાવ્યો છે. ગત ૧૧ મેના રોજ ગુજરાતના પીપાવાવ બંદરના વિસ્તરણ સંબંધિત એક મહત્વપૂર્ણ પર્યાવરણીય કેસની સુનાવણી દરમિયાન સુપ્રીમ કોર્ટના ચીફ જસ્ટિસે અરજી કરનારાઓ વિરુદ્ધ સખત નારાજગી વ્યક્ત કરી હતી. આ ટિપ્પણીના વિરોધમાં હવે દેશના ૬૦૦થી વધુ જાણીતા પર્યાવરણવાદીઓ, કાનૂની નિષ્ણાતો અને પૂર્વ અમલદારોએ એક થઈને CJIને એક ખુલ્લો પત્ર પાઠવ્યો છે, જેમાં તેમણે પોતાની ટિપ્પણીઓ સત્તાવાર રીતે પાછી ખેંચવાની ઉગ્ર માંગ કરી છે.

અદાલતી સુનાવણી દરમિયાન વલણ કડક કરતા પીએમ મોદીના કાર્યકાળમાં નિમાયેલા સીજેઆઈ સૂર્યકાન્તે જણાવ્યું હતું કે, દેશમાં જે રીતે પર્યાવરણના નામે અરજીઓનો પૂર આવ્યો છે, તે ન્યાય મેળવવાની ઇચ્છા ઓછી અને દેશના મોટા પ્રગતિશીલ પ્રોજેક્ટ્સને અટકાવવાની દૂષિત માનસિકતાથી વધુ પ્રેરિત દેખાય છે. તેમણે આકરા પ્રહાર કરતા ઉમેર્યું હતું કે, ભારતનો એક પણ એવો વિકાસ પ્રોજેક્ટ નથી કે જેનું આ કહેવાતા પર્યાવરણવાદીઓએ ખુલ્લા દિલથી સ્વાગત કર્યું હોય. હાથમાં ડિગ્રીઓ લઈને કેટલાક લોકો રાતોરાત RTI એક્ટિવિસ્ટ, સોશિયલ વર્કર કે પર્યાવરણપ્રેમી બની જાય છે અને કાનૂની પ્રક્રિયાનો દુરુપયોગ કરે છે.

CJIના આ પ્રહારથી નારાજ થયેલા સંગઠનોએ પત્રમાં લખ્યું છે કે, બંધારણીય દાયરામાં રહીને દેશના પર્યાવરણની રક્ષા માટે અને વહીવટી અનિયમિતતાઓ સામે અવાજ ઉઠાવવો એ દરેક નાગરિકનો મૂળભૂત અધિકાર છે. અદાલત દ્વારા જ જો આ રીતે જનહિતની અરજીઓ (PIL) કરનારાઓ પર પક્ષપાતી હોવાનો આક્ષેપ મૂકવામાં આવશે, તો ભવિષ્યમાં પ્રકૃતિના વિનાશ સામે અવાજ ઉઠાવવાનું સામાન્ય લોકો માટે અશક્ય બની જશે. દેશના સર્વોચ્ચ ન્યાયાધીશ અને પર્યાવરણ બચાવવા માટે લડતા પાયાના કાર્યકરો વચ્ચેનો આ વિવાદ આગામી દિવસોમાં ભારતીય ન્યાયતંત્રની ગરિમા અને પર્યાવરણીય નીતિઓ માટે ખૂબ જ વળાંકરૂપ સાબિત થઈ શકે છે.