પટના : બિહારના રાજકારણમાં મજબૂત પકડ જમાવ્યા બાદ કેન્દ્રીય મંત્રી ચિરાગ પાસવાનની પાર્ટી એલજેપી (રામ વિલાસ) હવે ઉત્તર પ્રદેશ અને પંજાબ તરફ આગળ વધી રહી છે. આ બંને રાજ્યોમાં આગામી વિધાનસભા ચૂંટણી લડવા માટે પાર્ટીએ રાષ્ટ્રીય લોકશાહી જોડાણ (એનડીએ) સમક્ષ સન્માનજનક બેઠકોની માંગણી કરી છે, જેથી હિન્દી ભાષી રાજ્યોમાં પક્ષના આધારને વધુ વિસ્તૃત કરી શકાય.

પાર્ટીના આ વિસ્તરણ પાછળ મુખ્ય હેતુ દલિત વોટ બેંકને પોતાના તરફ આકર્ષવાનો છે. ઉત્તર પ્રદેશમાં બિન-જાટવ દલિત મતદારો પર ખાસ નજર રાખવામાં આવી રહી છે જેઓ બસપાના નબળા પડ્યા બાદ નવા રાજકીય વિકલ્પની શોધમાં છે, જ્યારે પંજાબમાં જ્યાં દલિત વસ્તી આશરે ૩૨ ટકા છે ત્યાં ચિરાગ પાસવાનની યુવા અને દલિત નેતા તરીકેની છબીનો મહત્તમ લાભ એનડીએ મેળવવાનું વિચારી રહી છે.

આ રાજકીય રણનીતિના ભાગરૂપે ચિરાગ પાસવાન સતત સક્રિય છે અને તાજેતરમાં વારાણસીમાં કેન્દ્રીય મંત્રી રાજનાથ સિંહ સાથે બાઇક રેલીમાં પણ સામેલ થયા હતા. આ સાથે જ પોતાના ગૃહ રાજ્ય બિહારના યુવાનો સાથે સીધો સંવાદ સાધવા માટે તેઓ આગામી ૨૪ સપ્ટેમ્બરથી પટનાથી "યુવા બોલે તો" નામના વિશેષ જનસંપર્ક અભિયાનની શરૂઆત કરવા જઈ રહ્યા છે, જેના દ્વારા યુવાનોની રોજગારી અને કારકિર્દીના પ્રશ્નોને વાચા આપવામાં આવશે.

આ અગાઉ પણ વિવિધ રાજ્યોમાં પ્રાદેશિક સમીકરણો બદલાતા રહ્યા છે ત્યારે ચિરાગ પાસવાનનું આ પગલું એનડીએ ગઠબંધન માટે કેટલું ફાયદાકારક સાબિત થાય છે અને વિપક્ષી મત બેંકમાં કેટલું ગાબડું પાડે છે તે તો આગામી સમય જ બતાવશે.