બેંગલુરુ : વર્ષ 2016 પહેલા, વિશ્વની મહાસત્તા ગણાતા ચીનના રાષ્ટ્રપતિ પાસે વિદેશ પ્રવાસો માટે કોઈ કાયમી અને સુરક્ષિત VVIP વિમાન નહોતું, પરંતુ 2001માં અમેરિકાના સાન એન્ટોનિયો ખાતે તત્કાલીન રાષ્ટ્રપતિ જિયાંગ ઝેમિન માટે તૈયાર કરાયેલું એક ખાસ વિમાન બેઇજિંગ પહોંચતા જ મોટો વિવાદ સર્જાયો હતો. ‘ધ વોલ સ્ટ્રીટ જર્નલ’ના અહેવાલ મુજબ, આ વિમાનની અંદરથી લગભગ 27 જેટલા ગુપ્ત જાસૂસી અને સાંભળવાના ઉપકરણો મળી આવ્યા હતા, જેને કારણે ચીને આ વિમાનને સંપૂર્ણપણે નકારી કાઢ્યું હતું અને ત્યારથી રાષ્ટ્રપતિની સુરક્ષાને લઈને ગંભીર સવાલો ઉભા થયા હતા.

આ ઘટના અગાઉ ચીની રાષ્ટ્રપતિઓની વિદેશ યાત્રાઓ અત્યંત અનોખી અને અસ્થાયી પ્રક્રિયા હેઠળ થતી હતી, જેમાં ચીન પાસે અમેરિકન એરફોર્સ વન જેવું કોઈ સ્વતંત્ર વિમાન ન હોવાથી તેઓ એર ચાઇનાના સ્ટાન્ડર્ડ બોઇંગ 747-400 વિમાનનો ઉપયોગ કરતા હતા. રાષ્ટ્રપતિની કોઈપણ વિદેશ મુલાકાતના અંદાજે 20 દિવસ અગાઉ ચીની વાયુસેના દ્વારા આ સામાન્ય પેસેન્જર વિમાનને ખાસ VVIP કેબિનથી સજ્જ કરવામાં આવતું હતું, અને રાષ્ટ્રપતિનો પ્રવાસ પૂર્ણ થતાં જ તેની બેઠકો ફરીથી બદલી નાખીને તેને પાછું નિયમિત વાણિજ્યિક પેસેન્જર રૂટ પર દોડાવવામાં આવતું હતું.

સમયના બદલાવ સાથે હવે પરિસ્થિતિ બિલકુલ બદલાઈ ચૂકી છે અને વર્તમાન સમયમાં ચીનના રાષ્ટ્રપતિ શી જિનપિંગ દુનિયાના સૌથી આધુનિક અને સુરક્ષિત સુધારેલા બોઇંગ 747-8 વિમાનમાં સફર કરે છે, જે એર ચાઇના દ્વારા સંચાલિત થાય છે અને તે માત્ર એક લક્ઝરી જેટ નથી પરંતુ હવામાં ઉડતું દેશનું સર્વોચ્ચ કમાન્ડ સેન્ટર પણ છે. આ વિમાનને 2014ના અંતમાં એક સામાન્ય વાણિજ્યિક પેસેન્જર જેટ તરીકે સામેલ કરાયા બાદ, મે 2015માં પેસેન્જર સેવામાંથી પાછું ખેંચીને ગુપ્ત સુધારા માટે મોકલવામાં આવ્યું હતું અને આખરે 2016ના અંતમાં તેને રાષ્ટ્રપતિના પ્રાથમિક વિમાન તરીકે સત્તાવાર રીતે નિયુક્ત કરવામાં આવ્યું હતું.

આ 250 ફૂટ એટલે કે આશરે 76.3 મીટરની લંબાઈ ધરાવતું બોઇંગ 747-8 એ શ્રેણીનું સૌથી મોટું અને અંતિમ મોડેલ હોવાની સાથે વિશ્વનું સૌથી લાંબુ પેસેન્જર વિમાન છે, જેના આંતરિક ભાગના ફોટા આજદિન સુધી સત્તાવાર રીતે બહાર પાડવામાં આવ્યા નથી પરંતુ સુરક્ષા કારણોસર તેમાં અત્યાધુનિક હાઇ-ટેક કોન્ફરન્સ રૂમ, વૈભવી શયનખંડ, ખાનગી ઓફિસો અને અત્યંત સુરક્ષિત પ્રણાલીઓ હોવાનું માનવામાં આવે છે.