નવી દિલ્હી: ભારત અને ચીન વચ્ચેની સરહદ (LAC) પર તણાવ અને પહાડી વિસ્તારોની દુર્ગમ સ્થિતિને જોતા ભારત હવે પોતાની લશ્કરી તાકાતને વધુ ધારદાર બનાવી રહ્યું છે. આ દિશામાં બેલ્જિયમની દિગ્ગજ સંરક્ષણ કંપની ‘જોન કોકરિલ’ (John Cockerill) દ્વારા ભારતને એક અત્યંત શક્તિશાળી ‘105mm ટેન્ક બુર્જ’ વેચવાની ઓફર કરવામાં આવી છે. આ સિસ્ટમ ખાસ કરીને હિમાલય જેવા પર્વતીય અને અત્યંત મુશ્કેલ ભૂપ્રદેશોને ધ્યાનમાં રાખીને તૈયાર કરવામાં આવી છે, જે ચીનની ચિંતાનું મુખ્ય કારણ બની છે.

પર્વતીય યુદ્ધ માટે ‘સંજીવની’ સમાન ટેકનોલોજી

સામાન્ય રીતે ટેન્કોની ગોળીબાર કરવાની ક્ષમતા મર્યાદિત હોય છે, પરંતુ જોન કોકરિલના આ અદ્યતન બુર્જની સૌથી મોટી વિશેષતા એ છે કે તે 42 ડિગ્રી સુધીની ઊંચાઈ (Elevation) પર લક્ષ્યને ભેદી શકે છે. પર્વતીય યુદ્ધમાં દુશ્મન ઘણીવાર ઊંચા શિખરો કે પહાડોની ટોચ પર બેઠો હોય છે. આવી સ્થિતિમાં, આ બુર્જ ઊંચાઈ પર બેઠેલા દુશ્મનના ઠેકાણાઓને સચોટ રીતે નિશાન બનાવી શકે છે, જે સામાન્ય ટેન્ક માટે કરવું મુશ્કેલ હોય છે.

આધુનિક ફીચર્સ જે તેને બનાવે છે ખાસ:

·         ઓટોમેટિક લોડર: આ સિસ્ટમમાં દારૂગોળો લોડ કરવા માટે માનવીય હસ્તક્ષેપની ઓછી જરૂર પડે છે, જે યુદ્ધના મેદાનમાં ફાયરિંગની ગતિ વધારે છે અને સૈનિકોનું કાર્યભાર ઘટાડે છે.

·         અત્યાધુનિક ફાયર કંટ્રોલ: મુશ્કેલ અને ખાડા-ટેકરા વાળા ભૂપ્રદેશમાં પણ આ સિસ્ટમ અત્યંત ચોકસાઈ સાથે લક્ષ્યને ભેદવામાં સક્ષમ છે.

·         હળવા વજનની ફ્લેક્સિબિલિટી: આ કોઈ આખી ટાંકી નથી, પરંતુ એક બુર્જ સિસ્ટમ છે, જેને ભારત પોતાની જરૂરિયાત મુજબ અલગ-અલગ હળવા સશસ્ત્ર વાહનો પર સરળતાથી માઉન્ટ કરી શકે છે.

ભારતીય સેના માટે શા માટે છે મહત્વનું?

લદ્દાખ અને અરુણાચલ પ્રદેશ જેવા ઊંચાઈવાળા વિસ્તારોમાં ભારતીય સેનાને એવા પ્લેટફોર્મની જરૂર છે જે ઝડપી હોય અને પર્વતીય વિસ્તારમાં સરળતાથી હેરફેર કરી શકાય. આ ઓફર જો ભારતીય સેનાની ઓપરેશનલ જરૂરિયાતો અને પરીક્ષણોમાં સફળ સાબિત થશે, તો LAC પર ભારતની સ્થિતિ અત્યંત મજબૂત બનશે.

આ ટેકનોલોજીનો ઉપયોગ હિમાલયી સરહદ પર ભારતની રક્ષણાત્મક અને આક્રમક ક્ષમતાઓને એક નવા સ્તર પર લઈ જઈ શકે છે, જે ચીન જેવા પડોશી દેશો માટે એક મજબૂત સંદેશ સમાન છે.