ગુઆંગઝોઉ : આબોહવા પરિવર્તન (Climate Change) ના કારણે અત્યારે સમગ્ર વિશ્વ કુદરતી હોનારતોનો સામનો કરી રહ્યું છે, ત્યારે દક્ષિણ ચીનનો સમૃદ્ધ ગુઆંગડોંગ (Guangdong) પ્રાંત કુદરતના પ્રકોપનો ભોગ બન્યો છે. છેલ્લા કેટલાક દિવસોથી પડી રહેલા અતિભારે વરસાદને કારણે સમગ્ર વિસ્તારમાં પૂરની કટોકટી સર્જાઈ છે. પૂરના હાઈ-રિસ્ક ઝોન અને નીચાણવાળા વિસ્તારોમાં ફસાયેલા ૩૭,૬૦૦ થી વધુ લોકોને યુદ્ધના ધોરણે સુરક્ષિત સ્થળોએ ખસેડવામાં આવ્યા છે. વહીવટીતંત્રે પૂર નિયંત્રણ માટે 'લેવલ-III' અને આપત્તિ રાહત માટે 'લેવલ-IV' ની ઇમરજન્સી લાગુ કરી દીધી છે.

શાળાઓ બંધ અને રેલવે વ્યવહાર ખોરવાયો

ભારે વરસાદ અને જળબંબાકારની સ્થિતિને જોતા ઝુહાઈ (Zhuhai) અને શેનઝેન (Shenzhen) જેવા ચીનના પ્રખ્યાત મેગા સિટીઝમાં શાળાઓના વર્ગો તાત્કાલિક ધોરણે સ્થગિત કરી દેવામાં આવ્યા છે. મુસાફરોની સુરક્ષાને ધ્યાનમાં રાખીને ચાઇના રેલ્વે ગુઆંગઝોઉ ગ્રુપ દ્વારા અસંખ્ય ટ્રેનોના સમયપત્રકમાં મોટા ફેરફાર કરવામાં આવ્યા છે અને કેટલીક ટ્રેનો રદ પણ કરવામાં આવી છે.

રાહત અને બચાવ કામગીરી માટે મોટું સૈન્ય મેદાને

સત્તાવાર અહેવાલો અનુસાર, ગુઆંગડોંગ ફાયર એન્ડ રેસ્ક્યુ કોર્પ્સે પૂરગ્રસ્ત મુખ્ય શહેરોમાં ૨૪૭ અગ્નિશામકો, ૫૩ ફાયર એન્જિન અને ૩૭ અદ્યતન બોટ તૈનાત કરીને બચાવ કામગીરી તેજ કરી છે. બીજી તરફ, પ્રદેશના ડાઇક્સ (પૂર સંરક્ષણ દીવાલો) અને જળાશયો તૂટતા બચાવવા માટે જળ સંસાધન વિભાગના ૪૧,૭૬૮ જેટલા કર્મચારીઓ રાત-દિવસ નિરીક્ષણ કરી રહ્યા છે. આ ઉપરાંત, પાવર અને અન્ય સુવિધાઓ પુનઃસ્થાપિત કરવા માટે ૭,૨૨૬ ઇમરજન્સી કર્મચારીઓ, ૨,૯૯૪ સહાયક વાહનો અને ૨,૧૦૮ જનરેટર પણ મેદાને ઉતારાયા છે. રાહતની વાત એ છે કે હજુ સુધી કોઈ જાનહાનિના અહેવાલ નથી.

"જો વૈશ્વિક સ્તરે કાર્બન ઉત્સર્જન ઘટાડવા માટે તાત્કાલિક પગલાં લેવામાં નહીં આવે, તો ચીનમાં ગરમીના મોજા ૧,૫૬૩% લાંબા સમય સુધી ચાલશે. એટલું જ નહીં, ૨૦handle૫૦ સુધીમાં ચીનના ૨.૫ કરોડથી વધુ લોકો પૂરના જોખમ હેઠળ જીવતા હશે અને ૨૧૦૦ સુધીમાં નદીઓના પૂરથી ચીનને ૪૧૪ અબજ યુરોનું આર્થિક નુકસાન વેઠવું પડશે."

— G20 ક્લાઇમેટ રિસ્ક એટલાસનો ચોંકાવનારો અહેવાલ

હજુ પણ ભારે વરસાદની આશંકા

સ્થાનિક હવામાનશાસ્ત્રીય વેધશાળાના જણાવ્યા અનુસાર, દક્ષિણ ગુઆંગડોંગમાં હજુ પણ ભારેથી અતિભારે વરસાદ પડવાની સંભાવના છે. જોકે, શુક્રવાર અને શનિવારથી સમગ્ર પ્રાંતમાં વરસાદનું જોર થોડું નબળું પડી શકે છે. હાલમાં વહીવટીતંત્ર તમામ પરિસ્થિતિ પર ચાંપતી નજર રાખી રહ્યું છે અને નાગરિકોને ઘરની બહાર ન નીકળવા કડક સૂચના અપાઈ છે.