​નવી દિલ્હી:દેશમાં મતદાર યાદીઓની ખાસ સુધારણા પ્રક્રિયા (SIR - સ્પેશિયલ ઈન્ટેન્સિવ રિવિઝન) અને તેને અનુલક્ષીને નામો રદ થવા અંગે ચાલી રહેલા વિવાદો વચ્ચે ભારતીય ચૂંટણી પંચે એક અત્યંત મહત્વપૂર્ણ સ્પષ્ટતા જાહેર કરી છે. મુખ્ય ચૂંટણી કમિશનર (CEC) જ્ઞાનેશ કુમાર અને અન્ય ચૂંટણી આયુક્તો વચ્ચે યોજાયેલી ઉચ્ચસ્તરીય બેઠક બાદ પંચ દ્વારા પોઈન્ટ-બાય-પોઈન્ટ વિગતવાર ખુલાસો રજૂ કરવામાં આવ્યો છે, જેમાં પંચમાં આંતરિક અસંતોષ કે વિવાદ હોવાના અહેવાલોને નકારી કાઢવામાં આવ્યા છે.

​ચૂંટણી પંચે અધિકૃત રીતે સ્પષ્ટતા કરતા જણાવ્યું છે કે મતદાર યાદીઓની ખાસ સુધારણા પ્રક્રિયા (SIR) સંબંધિત તમામ નિર્ણયો ત્રણેય ચૂંટણી આયુક્તોની સર્વાનુમતીથી તથા કાયદાકીય પ્રક્રિયાઓનું સંપૂર્ણ પાલન કરીને જ લેવામાં આવ્યા છે. પંચમાં કોઈપણ પ્રકારની મનસ્વીતા કે કાયદાકીય ઉલ્લંઘન થયું નથી.

​અધિકારીઓની કામગીરી અને કેબિનેટ સેક્રેટરીને લખાયેલા પત્ર અંગે ખુલાસો કરતા પંચે જણાવ્યું હતું કે તે બાબત પંચની કે આઈટી વિંગની નીતિગત બાબતો સાથે સંકળાયેલી નહોતી, પરંતુ પ્રતિનિયુક્તિ (ડેપ્યુટેશન) પર આવેલા એક ચોક્કસ અધિકારીની કામગીરી સંબંધિત હતી. સંબંધિત અધિકારી દ્વારા જારી કરાયેલા કામની વહેંચણીના આદેશો બે ચૂંટણી કમિશનરોના આદેશ બાદ અમલમાં મુકાયા નહોતા, તેમજ ડેપ્યુટી ઈલેક્શન કમિશનર (DEC) પાસેથી આઈટી વિભાગની દેખરેખના અધિકારો ક્યારેય પાછા ખેંચવામાં આવ્યા નહોતા.

​આ ઉપરાંત પંચે માહિતી આપી હતી કે બિહાર અને પશ્ચિમ બંગાળ સહિત દેશના ૨૦ રાજ્યો અને કેન્દ્રશાસિત પ્રદેશોમાં ખાસ સુધારણા પ્રક્રિયા (SIR)નું કાર્ય સફળતાપૂર્વક પૂર્ણ થઈ ચૂક્યું છે. જો આ પ્રક્રિયા દરમિયાન કે ત્યારબાદ પણ કોઈ યોગ્ય નાગરિકનું નામ મતદાર યાદીમાં નોંધાવવાનું રહી ગયું હોય, અથવા તો કોઈ નવા કે પ્રથમ વખત મતદાન કરનારા યુવા મતદારો હોય, તો તેઓ નિરાશ થવાની જરૂર નથી. ચૂંટણી પંચની સતત અપડેટ (કંટીન્યુઅસ અપડેશન) થતી પ્રક્રિયા હેઠળ કોઈપણ વ્યક્તિ પોતાના વિસ્તારના ચૂંટણી નોંધણી અધિકારી (ERO) પાસે ફોર્મ ભરીને નામ ઉમેરવા માટે અરજી કરી શકે છે.

​આ સંદર્ભમાં ગોવાના મુખ્ય નિર્વાચન અધિકારી (CEO) દ્વારા છૂટી ગયેલા મતદારો માટે ખાસ ઝુંબેશ શરૂ કરવામાં આવી છે, જેમાં બૂથ લેવલ ઓફિસર (BLO) ને ઘરોઘર જઈને ફોર્મ જમા કરવાની સૂચના અપાઈ છે. આ પ્રક્રિયા હેઠળ ૯૭ માંથી ૮૧ વંચિત મતદારોએ નામ દાખલ કરાવવા ફોર્મ-૬ ભરી દીધું છે. સમગ્ર દેશમાં કોઈ પણ પાત્ર નાગરિક મતાધિકારથી વંચિત ન રહી જાય તે માટે ભારતીય ચૂંટણી પંચે તમામ સીઈઓ, ડીઈઓ અને ઈઆરઓ ને તાત્કાલિક અસરથી વિશેષ નોંધણી ઝુંબેશ હાથ ધરવા કડક નિર્દેશો જારી કર્યા છે.