નવી દિલ્હી : દેશમાં ચોખાના બજાર ભાવને નિયંત્રણમાં રાખવા અને બજારમાં તેની પૂરતી ઉપલબ્ધતા સુનિશ્ચિત કરવા માટે કેન્દ્ર સરકારે એક મોટો અને કડક નિર્ણય લીધો છે, જેના અંતર્ગત હવે તમામ વેપારીઓ, જથ્થાબંધ વેપારીઓ, છૂટક વેપારીઓ, મોટી રિટેલ ચેઈન અને મિલરો માટે સાપ્તાહિક ધોરણે ચોખા અને ડાંગરનો સ્ટોક જાહેર કરવો અનિવાર્ય બનાવી દેવામાં આવ્યો છે.

સરકાર દ્વારા જારી કરાયેલા નવા આદેશ મુજબ, સ્ટોક ધરાવતી તમામ સંસ્થાઓએ દર શુક્રવારે સત્તાવાર ફૂડ સ્ટોક પોર્ટલ પર બાસમતી, નોન-બાસમતી પ્રીમિયમ, નોન-બાસમતી, બાફેલા, તૂટેલા ચોખા અને ડાંગર—એમ કુલ છ શ્રેણીઓમાં પોતાના જથ્થાની સચોટ માહિતી રજૂ કરવી પડશે, અને જો કોઈ સંસ્થા આ પોર્ટલ પર નોંધણી નહીં કરાવે અથવા નિયમોનું ઉલ્લંઘન કરશે તો તેની સામે આવશ્યક ચીજવસ્તુ અધિનિયમ, ૧૯૫૫ હેઠળ કાયદાકીય કાર્યવાહી કરવામાં આવશે.

દેશમાં અનાજની સંગ્રહોખોરી અટકાવવા અને ગ્રાહકોને વાજબી ભાવે અનાજ મળી રહે તે હેતુથી કેન્દ્ર સરકારે આંધ્રપ્રદેશ, કર્ણાટક, કેરળ, તમિલનાડુ અને તેલંગાણા જેવા દક્ષિણ રાજ્યોને પરિસ્થિતિ મુજબ ચોખા અને ડાંગર પર સ્ટોક મર્યાદા (Stock Limit) લાદવાની સ્પષ્ટ સંમતિ આપી દીધી છે, જે આગામી ૩૧ જાન્યુઆરી, ૨૦૨૭ સુધી અમલમાં રહેશે.

આ ઉપરાંત, બજારમાં ચોખાનો પુરવઠો મોટા પ્રમાણમાં વધારવા માટે સરકારે નાણાકીય વર્ષ ૨૦૨૬-૨૭ માટે 'ઓપન માર્કેટ સેલ સ્કીમ (ડોમેસ્ટિક)' હેઠળ ચોખાના વેચાણના લક્ષ્યાંકને ૨૫ લાખ મેટ્રિક ટનથી વધારીને સીધો બમણો એટલે કે ૫૦ લાખ મેટ્રિક ટન કરી દીધો છે, જેથી કિંમતો પરનું દબાણ ઘટી શકે.

સાથોસાથ, NAFED, NCCF અને કેન્દ્રીય ભંડાર દ્વારા સબસિડીવાળા 'ભારત ચોખા' ની ઉપલબ્ધતા વધારવા માટે વિતરણ ચેનલોને પણ વધુ વિસ્તૃત કરવામાં આવી છે, જેનાથી ખાસ કરીને દક્ષિણ ભારતના બજારોમાં વધી રહેલા છૂટક ભાવ સામે સામાન્ય જનતાને મોટી રાહત મળશે.