નવી દિલ્હી, તા.૧૩: કેન્દ્રીય ગૃહ મંત્રાલય દ્વારા ડૉ. ઝાકિર નાઈક દ્વારા સ્થાપિત ‘ઇસ્લામિક રિસર્ચ ફાઉન્ડેશન’ (IRF) પરના પ્રતિબંધને વધુ પાંચ વર્ષ માટે લંબાવવાનો અત્યંત મહત્ત્વપૂર્ણ નિર્ણય લેવામાં આવ્યો છે, જેના સત્તાવાર આદેશો જારી કરી દેવાયા છે.

પ્રાપ્ત સત્તાવાર વિગતો અનુસાર, ગેરકાનૂની પ્રવૃત્તિઓ નિવારણ અધિનિયમ (UAPA) ૧૯૬૭ હેઠળ જારી કરાયેલા જાહેરનામા દ્વારા આ સંગઠનને ફરી એકવાર સત્તાવાર રીતે ‘ગેરકાનૂની સંગઠન’ (Unlawful Association) તરીકે જાહેર કરવામાં આવ્યું છે.

સરકાર દ્વારા આ પ્રતિબંધ લંબાવવા પાછળના મુખ્ય કારણો રજૂ કરતા જણાવવામાં આવ્યું છે કે સંસ્થાના સ્થાપક અને અધ્યક્ષની પ્રવૃત્તિઓ તેમજ તેમના વિવાદાસ્પદ ભાષણોથી વિવિધ ધાર્મિક સમુદાયો વચ્ચે નફરત, દુશ્મનાવટ અને વૈમનસ્ય ફેલાવાનું ગંભીર જોખમ રહેલું છે.

ગૃહ મંત્રાલયના અહેવાલમાં સ્પષ્ટ કરવામાં આવ્યું છે કે જો આ સંગઠન પરનો પ્રતિબંધ લંબાવવામાં ન આવે તો તે દેશવિરોધી પ્રવૃત્તિઓ ફરી શરૂ કરી શકે છે, જે ભારતની સાર્વભૌમત્વ, અખંડિતતા અને આંતરિક સુરક્ષા માટે મોટો ખતરો સાબિત થઈ શકે છે.

ઉલ્લેખનીય છે કે અગાઉ પણ ભારત સરકાર દ્વારા આ સંગઠન પર યુવાનોને કટ્ટરપંથી બનાવવા, રાષ્ટ્રીય સુરક્ષા વિરુદ્ધ કામ કરવા અને મની લોન્ડરિંગ જેવા ગંભીર આરોપો હેઠળ પ્રતિબંધ મૂકવામાં આવ્યો હતો જે હવે નવા જાહેરનામા મુજબ આગામી પાંચ વર્ષ સુધી યથાવત રહેશે.

આ સખત પગલાં બાદ સુરક્ષા એજન્સીઓ દ્વારા સંગઠન સાથે સંકળાયેલી શંકાસ્પદ ગતિવિધિઓ પર સતત કડક નજર રાખવામાં આવી રહી છે અને દેશની આંતરિક શાંતિ જાળવવા માટે વહીવટી તંત્ર દ્વારા તમામ જરૂરી કાયદાકીય પગલાંઓનું પાલન સુનિશ્ચિત કરવામાં આવી રહ્યું છે.