નવી દિલ્હી : ખાંડના વધતા ભાવ અને સંગ્રહખોરી સામે સરકારે જથ્થા મર્યાદા કડક કરી છે તથા દસ લાખ ટન કાચી ખાંડની શુલ્કમુક્ત આયાતને મંજૂરી આપી છે.

તહેવારોની મોસમ પહેલાં ખાંડના વધતા ભાવને કાબૂમાં લેવા કેન્દ્ર સરકારે અનેક મહત્વના પગલાં લીધા છે. સરકારે દેશભરના ખાંડ વેપારીઓ માટે જથ્થા મર્યાદા અમલમાં મૂકી છે. તા.૧ ઓગસ્ટથી લાગુ રહેલી ૪૦૦ ટનની મર્યાદાને વધુ કડક બનાવી તા.૧૫ સપ્ટેમ્બરથી ૨૦૦ ટન કરવાની જાહેરાત કરવામાં આવી છે. આ વ્યવસ્થા તા.૩૦ નવેમ્બર સુધી અમલમાં રહેશે.

સરકારે મોટી માત્રામાં ખાંડ વાપરતા ઉદ્યોગો અને સંસ્થાઓ માટે પણ નિયંત્રણ મૂક્યું છે. તા.૧ સપ્ટેમ્બરથી આવા ગ્રાહકો પોતાની અંદાજિત જરૂરિયાતના માત્ર ૧૫ દિવસ જેટલો જ જથ્થો રાખી શકશે. સંગ્રહખોરી અને કૃત્રિમ અછત અટકાવવા કેન્દ્ર અને રાજ્ય સરકારોની સંયુક્ત ટીમો ખાંડ મિલોના જથ્થાની ચકાસણી કરશે.

પુરવઠો વધારવાના ભાગરૂપે દસ લાખ ટન કાચી ખાંડની શુલ્કમુક્ત આયાતની મંજૂરી આપવામાં આવી છે. ઉપરાંત ખાંડ મિલોને તા.૧૫ ઓક્ટોબરથી શેરડી પિલાણ શરૂ કરવાની સલાહ અપાઈ છે. સરકારનું કહેવું છે કે આ પગલાંથી બજારમાં ખાંડની ઉપલબ્ધતા વધશે અને તહેવારો દરમિયાન ભાવમાં અનિયંત્રિત તેજી રોકવામાં મદદ મળશે.