નવી દિલ્હી, તા.૧૩: સેન્ટ્રલ બોર્ડ ઓફ સેકન્ડરી એજ્યુકેશન (CBSE) દ્વારા આજે ધોરણ 12નું વર્ષ 2026નું પરિણામ સત્તાવાર રીતે જાહેર કરવામાં આવ્યું છે. આ વર્ષે કુલ 85.20% વિદ્યાર્થીઓ સફળતાપૂર્વક પાસ થયા છે. જોકે, પાછલા વર્ષના 88.39% ના આંકડાની સરખામણીએ આ વખતે પરિણામમાં 3.19% નો ઘટાડો નોંધાયો છે. પરિણામ જાહેર થતાની સાથે જ ક્યાંક ખુશી તો ક્યાંક ગમગીનીનો માહોલ જોવા મળી રહ્યો છે, પરંતુ એક વાત ફરી સાબિત થઈ છે કે શિક્ષણ ક્ષેત્રે દીકરીઓનું વર્ચસ્વ અકબંધ છે.

દીકરીઓએ ફરી ગાડું ગબડાવ્યું: છોકરાઓ પાછળ રહી ગયા

CBSE દ્વારા જાહેર કરાયેલા આંકડા મુજબ, આ વર્ષે પણ છોકરીઓએ છોકરાઓ કરતા ઘણો સારો દેખાવ કર્યો છે. કુલ 88.86% છોકરીઓ પરીક્ષામાં પાસ થઈ છે, જેની સામે છોકરાઓનો પાસ થવાનો દર 82.13% રહ્યો છે. આમ, દીકરીઓએ છોકરાઓ કરતા 6.73% વધુ પરિણામ લાવીને પરિવાર અને બોર્ડનું ગૌરવ વધાર્યું છે. કુલ 15,07,109 વિદ્યાર્થીઓએ સફળતાપૂર્વક ધોરણ 12નો ઉંબરો ઓળંગ્યો છે.

ટેકનોલોજીનો ઉપયોગ: 98 લાખ ઉત્તરવહીઓનું ડિજિટલ મૂલ્યાંકન

બોર્ડના અધિકારીઓએ જણાવ્યું હતું કે, આ વર્ષે મૂલ્યાંકન પ્રક્રિયાને વધુ પારદર્શક અને સચોટ બનાવવા માટે 'ઓન-સ્ક્રીન માર્કિંગ' (OSM) સિસ્ટમનો ઉપયોગ કરવામાં આવ્યો હતો. આ સિસ્ટમ હેઠળ કુલ 9,866,222 ઉત્તરવહીઓ તપાસવામાં આવી હતી. આ વર્ષે 1.7 મિલિયન (17 લાખ) થી વધુ વિદ્યાર્થીઓએ પરીક્ષા માટે રજીસ્ટ્રેશન કરાવ્યું હતું, જેમાંથી 15 લાખથી વધુ વિદ્યાર્થીઓ ઉચ્ચ શિક્ષણ માટે લાયક ઠર્યા છે.

મેરિટમાં દબદબો: 17,000 વિદ્યાર્થીઓએ 95% થી વધુ ગુણ મેળવ્યા

પરિણામમાં ટકાવારી ભલે થોડી ઘટી હોય, પણ તેજસ્વી વિદ્યાર્થીઓની સંખ્યા આશ્ચર્યજનક છે. બોર્ડની વિગતો અનુસાર, દેશભરમાંથી 17,000 થી વધુ વિદ્યાર્થીઓએ 95% થી વધુ ગુણ મેળવીને રેકોર્ડ સર્જ્યો છે. આ વિદ્યાર્થીઓએ સાબિત કર્યું છે કે મહેનત અને લગન હોય તો ગમે તેવા મુશ્કેલ પેપરમાં પણ શ્રેષ્ઠ પરિણામ લાવી શકાય છે. વિદ્યાર્થીઓ હવે CBSEની સત્તાવાર વેબસાઈટ પર જઈને પોતાનું પરિણામ ચેક કરી શકે છે. સંઘર્ષ અને સફળતાની આ કહાની વચ્ચે હવે કોલેજ એડમિશનની દોડધામ શરૂ થશે.