નવી દિલ્હી : CBIએ 6,000 કરોડના મહાદેવ સટ્ટાબાજી એપ અને તેની સાથે જોડાયેલા ભ્રષ્ટાચારના કેસમાં વધુ 6 ચાર્જશીટ દાખલ કરી છે. આ ચાર્જશીટમાં અસીમ દાસ, રોહિત ગુલાટી, વિકાસ છપરિયા, અનિલ ધમ્માની, વિશાલ આહુજા અને ધીરજ આહુજા જેવા મુખ્ય નામોનો સમાવેશ થાય છે. તપાસ એજન્સીએ આ તમામ પર છેતરપિંડી, જાળસાજી અને ગુનાહિત કાવતરું રચવાના ગંભીર આરોપો મૂક્યા છે. આ અગાઉ, CBIએ 66 અન્ય આરોપીઓ વિરુદ્ધ પણ 5 અલગ-અલગ ચાર્જશીટ દાખલ કરી હતી, જેમાં એપના સંસ્થાપક સૌરભ ચંદ્રાકર અને સહ-સંસ્થાપક રવિ ઉપ્પલનું નામ મુખ્ય છે. આ સિન્ડિકેટ દ્વારા ભારતમાં ગેરકાયદે સટ્ટાબાજીનું મોટું નેટવર્ક ચલાવવામાં આવતું હતું.

વિદેશમાં બેસીને ચાલતું હતું કૌભાંડ

તપાસમાં સામે આવ્યું છે કે સૌરભ ચંદ્રાકર અને રવિ ઉપ્પલ દ્વારા સોશિયલ મીડિયાના માધ્યમથી લાખો યુઝર્સને આ જાળમાં ફસાવવામાં આવતા હતા. સટ્ટાબાજીમાંથી થતી કરોડોની કમાણીને 'મ્યુલ એકાઉન્ટ્સ'ના જાળ દ્વારા મની લોન્ડરિંગ કરીને વિદેશ મોકલી દેવામાં આવતી હતી. આ કમાણીનો એક હિસ્સો સરકારી અધિકારીઓને 'પ્રોટેક્શન મની' તરીકે ચૂકવવામાં આવતો હોવાનો પણ ઘટસ્ફોટ થયો છે. આ કૌભાંડના મુખ્ય સૂત્રધાર સૌરભ ચંદ્રાકર અને રવિ ઉપ્પલ સહિતના ચાર મુખ્ય આરોપીઓ હાલ પશ્ચિમ એશિયાના દેશોમાં છુપાયેલા છે. સીબીઆઈએ તેમની વિરુદ્ધ 'રેડ કોર્નર નોટિસ' જારી કરી દીધી છે અને તેમને 'ભગોડા આર્થિક અપરાધી' જાહેર કરવા માટેની કાયદાકીય પ્રક્રિયા પણ ઝડપથી શરૂ કરી દેવામાં આવી છે.

કેન્દ્રીય તપાસ એજન્સીનું માનવું છે કે આ સિન્ડિકેટનું નેટવર્ક ઘણું મોટું છે, જેને મળતા રાજકીય અને અમલદારશાહીના રક્ષણની પણ તપાસ કરવામાં આવી રહી છે. હાલમાં એજન્સી વધુ પુરાવા એકત્રિત કરી રહી છે, જેના આધારે આગામી દિવસોમાં વધુ ચાર્જશીટ દાખલ કરવામાં આવે તેવી પ્રબળ શક્યતા છે. દેશના સૌથી મોટા સટ્ટાબાજીના સિન્ડિકેટના મૂળ સુધી પહોંચવા માટે સીબીઆઈ આક્રમક રીતે તપાસ ચલાવી રહી છે. કાયદાના ગાળામાં આ તમામ આરોપીઓને લાવવા માટે ભારત સરકાર અન્ય દેશોની એજન્સીઓ સાથે પણ સંપર્કમાં છે, જેથી તેમને વહેલી તકે ભારત લાવીને કડક સજા અપાવી શકાય.