ભોપાલ : કેન્દ્રીય પરિવહન મંત્રી નીતિન ગડકરીએ મધ્યપ્રદેશમાં મુખ્યમંત્રીના સુગમ પરિવહન સેવાના લોન્ચિંગ પ્રસંગે ઇથેનોલ અંગે એક નવું અને ક્રાંતિકારી વિઝન રજૂ કર્યું છે. તેમણે બોલ્ડ દાવો કર્યો છે કે ઓક્ટોબર સુધીમાં ઘણી અગ્રણી કંપનીઓ ૧૦૦% ઇથેનોલથી ચાલતી કાર અને ફ્લેક્સ-એન્જિન વાહનો બજારમાં લોન્ચ કરવા જઈ રહી છે, જેનો ઇંધણ ખર્ચ માત્ર ૨૫ રૂપિયા પ્રતિ લિટર જેટલો જ આવશે.

કાર્યક્રમમાં વિગતવાર વાત કરતા તેમણે જણાવ્યું કે દેશમાં હાલ ૪૦ મિલિયન કાર અને ૨૦૦ મિલિયન ટુ-વ્હીલર ઉપલબ્ધ છે, અને તેમની પોતાની ટોયોટા ઇનોવા પણ ૧૦૦% ઇથેનોલ પર ચાલે છે. પેટ્રોલની સરખામણીમાં આ ઇંધણ ખૂબ જ કિફાયતી સાબિત થઈ રહ્યું છે. આ સાથે જ તેમણે ઇલેક્ટ્રિક બસો, સ્કૂટર્સ અને ખેતરોમાં ઉપયોગમાં લેવાતા ચાર્જેબલ ઇલેક્ટ્રિક ટ્રેક્ટર્સની સફળતા વિશે પણ માહિતી આપી હતી, જેનાથી તેમનું અંગત ઇંધણ બિલ શૂન્ય થઈ ગયું છે.

નીતિન ગડકરીએ એમ પણ ઉમેર્યું કે તેઓ ટૂંક સમયમાં જ પાણીમાંથી બનાવેલા હાઇડ્રોજન પર ચાલતી બસો અને ટ્રકો પણ રજૂ કરવાના છે. આગામી મહિને ટાટા, સુઝુકી, ટોયોટા અને મહિન્દ્રા દ્વારા ૧૦૦% ઇથેનોલ-સંચાલિત વાહનો આવવાથી દેશના ૨૨ લાખ કરોડ રૂપિયાના ઇંધણ આયાત ખર્ચની બચત થશે. આ ક્રાંતિથી મકાઈના ઉત્પાદન સાથે જોડાયેલા ખેડૂતો અને મજૂરોની આવક પણ પ્રતિ ક્વિન્ટલ ૧,૨૦૦ રૂપિયાથી વધીને ૩,૬૦0 રૂપિયા સુધી પહોંચી ગઈ છે અને ગ્રામીણ અર્થતંત્રને મોટું બળ મળ્યું છે.

અગાઉ સરકાર દ્વારા પેટ્રોલ સાથે ૨૦% ઇથેનોલ મિશ્રણ સફળતાપૂર્વક લાગુ કરવામાં આવ્યું છે, જે અમેરિકા અને જર્મની સહિતના ૧૯ દેશોમાં પણ અમલમાં છે. હવે આ નવા ફ્લેક્સ-એન્જિન વાહનોના આગમનથી દેશમાં હરિયાળી ક્રાંતિની સાથે પર્યાવરણને અનુકૂળ અને સસ્તા પરિવહનની નવી દિશા ખૂલી રહી છે, જેના પર હવે આગામી ઓક્ટોબર મહિનાથી અમલીકરણ શરૂ થશે.