લંડન: આપણે અત્યાર સુધી સાંભળ્યું છે કે સારું સ્વાસ્થ્ય મેળવવા માટે જીમમાં પરસેવો પાડવો અથવા ડાયેટિંગ કરવું જરૂરી છે, પરંતુ હવે વિજ્ઞાને એક નવી અને વધુ મનોરંજક રીત શોધી કાઢી છે. યુનિવર્સિટી કોલેજ લંડન (UCL) ના તાજેતરના અભ્યાસ મુજબ, જો તમે ચિત્રકામ કરો છો, સંગીત સાંભળો છો અથવા કોઈ મ્યુઝિયમની મુલાકાત લો છો, તો તમારું શરીર જૈવિક રીતે (Biologically) ધીરે-ધીરે વૃદ્ધ થાય છે. આ સંશોધને સાબિત કર્યું છે કે કલા એ માત્ર મનોરંજન નથી, પણ 'યુવાનીનું ઈન્જેક્શન' પણ છે.

કસરત કરતા પણ કલા ચઢિયાતી!

સંશોધનના મુખ્ય લેખક પ્રોફેસર ડેઝી ફેનકોર્ટના જણાવ્યા અનુસાર, કલા અને સાંસ્કૃતિક પ્રવૃત્તિઓ ધૂમ્રપાન છોડવા જેટલી જ અસરકારક સાબિત થઈ શકે છે. અભ્યાસમાં જાણવા મળ્યું છે કે જે લોકો અઠવાડિયામાં ઓછામાં ઓછી એક વાર કલાત્મક પ્રવૃત્તિમાં જોડાય છે, તેઓ અન્ય લોકો કરતા સરેરાશ એક વર્ષ નાના દેખાય છે. આશ્ચર્યની વાત એ છે કે, અઠવાડિયે એકવાર કસરત કરનારા લોકો આ માપદંડમાં માત્ર છ મહિના જ નાના જોવા મળ્યા હતા.

વૃદ્ધત્વની ગતિમાં 4% નો ઘટાડો

3,556 પુખ્ત વયના લોકોના રક્ત પરીક્ષણ અને "એપિજેનેટિક ઘડિયાળો" ના વિશ્લેષણ પરથી જાણવા મળ્યું કે જેઓ દર અઠવાડિયે ગાવા, નાચવા કે હસ્તકલા જેવી પ્રવૃત્તિઓ કરે છે, તેમની વૃદ્ધત્વની પ્રક્રિયા 4% જેટલી ધીમી પડી જાય છે. માસિક પ્રવૃત્તિમાં આ દર 3% જોવા મળ્યો હતો. ખાસ કરીને 40 વર્ષથી વધુ ઉંમરના લોકો માટે આ 'કલાત્મક થેરાપી' વરદાન સમાન સાબિત થઈ રહી છે.

તણાવ મુક્તિ અને સ્વાસ્થ્યનો સંગમ

આર્ટ્સ કાઉન્સિલ ઇંગ્લેન્ડના ડિરેક્ટર હોલી સ્મિથ-ચાર્લ્સે આ તારણોને વધાવતા કહ્યું કે, સર્જનાત્મક પ્રવૃત્તિઓ માત્ર મનને જ નહીં પણ શરીરને પણ લાંબા સમય સુધી જીવંત રાખે છે. તે તણાવ ઘટાડે છે, શરીરમાં બળતરા (Inflammation) ઓછી કરે છે અને હૃદય રોગના જોખમને પણ ટાળે છે. બીજા વિશ્વયુદ્ધના અંધકાર પછી જે રીતે કલાએ વિશ્વને બેઠું કર્યું હતું, તેવી જ રીતે આજે તે આપણી જૈવિક ઘડિયાળને રિપેર કરવાનું કામ કરી રહી છે.

ટૂંકમાં, જો તમારે લાંબુ અને યુવાન જીવન જીવવું હોય, તો હવે જીમની મેમ્બરશિપની સાથે એક પેઈન્ટિંગ બ્રશ અથવા મ્યુઝિયમની ટિકિટ પણ વસાવી લેવા જેવી છે!