નવી દિલ્હી : ભારતમાં ઝડપથી બદલાઈ રહેલી ઓટોમોબાઈલ ટેકનોલોજી અને પર્યાવરણ પ્રત્યેની જાગૃતિને કારણે પરંપરાગત ઇંધણની માંગ પર મોટી બ્રેક વાગે તેવી શક્યતાઓ દેખાઈ રહી છે. તાજેતરના એક મહત્વપૂર્ણ અહેવાલ મુજબ વર્ષ ૨૦૨૬ સુધીમાં ભારતમાં પેટ્રોલ અને ડીઝલ જેવા પરંપરાગત ઇંધણની માંગમાં ભારે ઘટાડો થવાની સંભાવના છે. આ ઘટાડા માટે મુખ્યત્વે દેશમાં ઇલેક્ટ્રિક વાહનો એટલે કે ઇવી કાર અને ટૂ-વ્હીલર્સના વેચાણમાં થઈ રહેલો વિસ્ફોટક વધારો જવાબદાર માનવામાં આવી રહ્યો છે.

આ સંશોધન અહેવાલમાં સ્પષ્ટપણે દર્શાવવામાં આવ્યું છે કે પરંપરાગત ઇંધણોમાં સૌથી વધુ ફટકો પેટ્રોલની ખપતને પડવાનો છે. ભારતીય મધ્યમ વર્ગ હવે પેટ્રોલના સતત વધતા જતા ભાવો અને પ્રદૂષણની સમસ્યાથી બચવા માટે સીએનજી અને ખાસ કરીને બેટરી સંચાલિત વાહનો ખરીદવાનું વધુ પસંદ કરી રહ્યો છે. આ ઉપરાંત કેન્દ્ર અને રાજ્ય સરકારો દ્વારા ઇલેક્ટ્રિક વાહનોની ખરીદી પર આપવામાં આવતી વિવિધ સબસિડી પણ આ ઇંધણની માંગ ઘટાડવામાં મોટો ભાગ ભજવી રહી છે.

નિષ્ણાતોના મતે માત્ર ખાનગી વાહનો જ નહીં પરંતુ જાહેર પરિવહન અને કોમર્શિયલ વાહનોમાં પણ હવે ડીઝલના સ્થાને બાયો-ફ્યુઅલ, ઇથેનોલ બ્લેન્ડિંગ અને ગ્રીન હાઇડ્રોજન જેવી આધુનિક પ્રણાલીઓ અપનાવવામાં આવી રહી છે. સરકાર દ્વારા પેટ્રોલમાં ઇથેનોલનું મિશ્રણ વધારીને ૨૦ ટકા સુધી લઈ જવાનો જે લક્ષ્યાંક રાખવામાં આવ્યો છે તેનાથી પણ ક્રૂડ ઓઈલની આયાત અને પેટ્રોલના સીધા વપરાશમાં મોટો ઘટાડો જોવા મળશે જે દેશના અર્થતંત્ર માટે સકારાત્મક બાબત છે.

જોકે ઇંધણની માંગમાં થનારા આ ઘટાડાને કારણે દેશની અગ્રણી ઓઇલ રિફાઇનરી કંપનીઓ અને પેટ્રોલ પંપ સંચાલકોએ પણ પોતાની વ્યાપારી વ્યુહરચના બદલવાની ફરજ પડશે. ભવિષ્યમાં પરંપરાગત પેટ્રોલ પંપો પર ચાર્જિંગ સ્ટેશનો અને આલ્ટરનેટિવ ફ્યુઅલ ઓપ્શન્સ ઉપલબ્ધ કરાવવા પડશે. આગામી સમય સંપૂર્ણપણે ગ્રીન એનર્જીનો હોવાથી ભારતમાં ઉર્જા ક્ષેત્રે આ બહુ મોટો અને ઐતિહાસિક બદલાવ સાબિત થઈ શકે છે.