નવી દિલ્હી : કેન્દ્રીય બજેટ 2027-28 પહેલા ઉદ્યોગ સંસ્થા PHDCCI દ્વારા સરકાર સમક્ષ એક મહત્વપૂર્ણ પૂર્વ-બજેટ પ્રસ્તાવ રજૂ કરવામાં આવ્યો છે. 10 નવેમ્બરના રોજ નાણામંત્રી નિર્મલા સીતારમણને સુપરત કરવામાં આવેલી ભલામણોમાં ઇક્વિટી રોકાણો પર લાંબા ગાળાના મૂડી લાભ (LTCG) ટેક્સ સંપૂર્ણપણે નાબૂદ કરવા, ટૂંકા ગાળાના મૂડી લાભ (STCG) ટેક્સ 20% થી ઘટાડીને 10% કરવા અને સિક્યોરિટીઝ ટ્રાન્ઝેક્શન ટેક્સ (STT) દરમાં ઘટાડો કરવાની પ્રબળ માગણી કરવામાં આવી છે.
આ દરખાસ્તો ઉદ્યોગ સંસ્થા દ્વારા વ્યવસાયો, ખાસ કરીને સૂક્ષ્મ, નાના અને મધ્યમ ઉદ્યોગો (MSMEs) માટે ઇક્વિટી ફાઇનાન્સિંગની ઍક્સેસ સુધારવા માટેના વ્યાપક દબાણ સાથે રજૂ કરવામાં આવી છે. ઉદ્યોગ સંસ્થાનું માનવું છે કે મૂડી બજાર કરવેરાનું તાર્કિકીકરણ કરવાથી રોકાણકારોને લાંબા ગાળાના રોકાણ માટે પ્રોત્સાહન મળશે અને વૈશ્વિક સ્તરે રોકાણ સ્થળ તરીકે ભારતની સ્પર્ધાત્મકતામાં સુધારો થશે.
આ સંદર્ભમાં વાત કરતા PHDCCI ના સેક્રેટરી જનરલ અને ચીફ એક્ઝિક્યુટિવ ઓફિસર રણજીત મહેતાએ જણાવ્યું હતું કે, "અમારું માનવું છે કે ક્રેડિતની સરળ પહોંચ, ઇક્વિટી સપોર્ટ, કરવેરાને તર્કસંગત બનાવવા અને સરકારી યોજનાઓના મજબૂત અમલીકરણથી વૈશ્વિક ઉત્પાદન કેન્દ્ર તરીકે ભારતીય ઉદ્યોગનો ઝડપી વિકાસ શક્ય બનશે."
PHDCCI ની આ ભલામણો બાદ હવે સમગ્ર શેરબજાર અને ઉદ્યોગ જગતની નજર નાણા મંત્રાલયના આગામી વલણ પર ટકેલી છે. નાણા મંત્રાલય પૂર્વ-બજેટ બેઠકો દરમિયાન વિવિધ ક્ષેત્રોના પ્રતિનિધિઓ સાથે ચર્ચા કરીને આ પ્રસ્તાવો પર વિચારણા કરશે અને બજેટ 2027-28માં કરવેરા સંબંધિત આ છૂટછાટો અંગે અંતિમ નિર્ણય લેવાશે.