અમદાવાદ, તા.26: મોબાઈલ રિચાર્જના સતત વધતા ભાવથી પરેશાન થયેલી સામાન્ય જનતા માટે સરકારી ટેલિકોમ કંપની BSNL (ભારત સંચાર નિગમ લિમિટેડ) એક ખુશખબર લઈને આવી છે. ખાનગી ટેલિકોમ કંપનીઓની મનમાની અને મોંઘા પ્લાન સામે BSNLએ હવે આક્રમક રીતે ગ્રાહકોને આકર્ષવાનું શરૂ કર્યું છે. કંપનીએ નવા ગ્રાહકો માટે એક અત્યંત આકર્ષક અને સસ્તી પ્રોમોશનલ ઓફર ‘BSNL Freedom 2.0’ લોન્ચ કરી છે, જેમાં માત્ર 1 રૂપિયાના પ્રારંભિક ખર્ચે અનેક મફત સુવિધાઓ આપવામાં આવી રહી છે.

BSNL દ્વારા તેમના સત્તાવાર 'X' (ટ્વિટર) હેન્ડલ પર આ ઓફર અંગેની વિગતો શેર કરવામાં આવી છે. આ ઓફર ખાસ કરીને એવા યુઝર્સ માટે ડિઝાઇન કરવામાં આવી છે જેઓ ઓછા ખર્ચે સેકન્ડરી સિમ ચાલુ રાખવા માગે છે અથવા તો નવું કનેક્શન લેવા ઈચ્છે છે.

‘BSNL Freedom 2.0’ ઓફરમાં મળશે આ ધમાકેદાર ફાયદાઓ:
•    તદ્દન ફ્રી SIM કાર્ડ: જો તમે BSNLનું નવું કનેક્શન લેવા માગો છો, તો આ ઓફર હેઠળ કંપની તરફથી સિમ કાર્ડ બિલકુલ ફ્રીમાં આપવામાં આવશે.

•    રોજ 1GB હાઇ-સ્પીડ ડેટા: ઈન્ટરનેટ વાપરવા માટે ગ્રાહકોને દરરોજ 1GB હાઈ-સ્પીડ ડેટા મળશે, જેનાથી સોશિયલ મીડિયા બ્રાઉઝિંગ, યુટ્યુબ વીડિયો અને રોજના ઓનલાઈન કામ સરળતાથી થઈ શકશે.

•    અનલિમિટેડ વોઇસ કૉલિંગ: ગ્રાહકો દેશના કોઈપણ નેટવર્ક પર મુક્તપણે વાતો કરી શકશે, કારણ કે આમાં કોઈપણ પ્રકારના એક્સ્ટ્રા ચાર્જ વગર અનલિમિટેડ વોઇસ કૉલિંગની સુવિધા ઉપલબ્ધ છે.

•    ડેઇલી 100 SMS: મેસેજિંગ સુવિધા માટે દરરોજ 100 ફ્રી SMS આપવામાં આવશે.

24 દિવસની વેલિડિટી અને લિમિટેડ પીરિયડ ઓફર
આ ઓફર અંતર્ગત મળતા તમામ બેનિફિટ્સની વેલિડિટી 24 દિવસની રહેશે. એટલે કે ગ્રાહકો સળંગ 24 દિવસ સુધી દરરોજ 1GB ડેટા, 100 SMS અને અનલિમિટેડ કૉલિંગનો મફત લાભ ઉઠાવી શકશે.

જોકે, આ લાભ લેવા માટે ગ્રાહકોએ સમયમર્યાદા ધ્યાનમાં રાખવી પડશે. BSNLની આ પ્રોમોશનલ ‘Freedom 2.0’ ઓફર 12 ઓક્ટોબર 2026 સુધી જ માન્ય રાખવામાં આવી છે. તેથી નવું સિમ કાર્ડ લેવા ઈચ્છુક ગ્રાહકોએ નજીકના BSNL સર્વિસ સેન્ટર અથવા અધિકૃત રિટેલર સ્ટોર પર જઈને આ ઓફરનો લાભ ઝડપથી મેળવી લેવો જોઈએ.