નવી દિલ્હી : સરકારી ટેલિકોમ કંપની ભારત સંચાર નિગમ લિમિટેડ (BSNL) એ બ્રોડબેન્ડ વપરાશકર્તાઓ માટે અત્યંત આકર્ષક અને સસ્તો માત્ર રૂ. ૨૫૯ નો નવો પ્લાન લોન્ચ કર્યો છે. આ પ્લાન દ્વારા કંપની ગ્રામીણ વિસ્તારોના ગ્રાહકોને સુપરફાસ્ટ ઇન્ટરનેટ, અમર્યાદિત વૉઇસ કૉલિંગ અને મનોરંજન માટે ઓટીટી એપ્લિકેશનની ઉત્તમ સુવિધા પૂરી પાડી રહી છે. ભારતનેટ ફાઇબર હેઠળ રજૂ કરવામાં આવેલી આ નવી સેવાના કારણે સામાન્ય ગ્રાહકો ઓછા ખર્ચે હાઇ-સ્પીડ ઇન્ટરનેટનો લાભ મેળવી શકશે, જે ખાનગી કંપનીઓને મોટી ટક્કર આપશે.

વિગતવાર માહિતી અનુસાર, BSNL નો આ ૨૫૯ રૂપિયાનો માસિક બ્રોડબેન્ડ પ્લાન ખાસ કરીને ગ્રામીણ વપરાશકર્તાઓને ધ્યાનમાં રાખીને બનાવવામાં આવ્યો છે, જેમાં ૨૫ Mbps સુધીની સ્પીડ સાથે અનલિમિટેડ ડેટા આપવામાં આવે છે. આ પ્લાન સાથે ગ્રાહકોને સમગ્ર ભારતમાં કોઈપણ નેટવર્ક પર મફત અનલિમિટેડ વૉઇસ કૉલિંગનો લાભ મળે છે. એટલું જ નહીં, કંપની આ પ્લાન સાથે ફ્રી હોમ ઇન્સ્ટોલેશન અને મોડેમની ભેટ આપી રહી છે, સાથે જ મનોરંજન માટે Waves OTT એપ્લિકેશનની ફ્રી એક્સેસ પણ ઉપલબ્ધ કરાવી રહી છે.

આ ઉપરાંત દિવાળી પર્વ નિમિત્તે બીએસએનએલ દ્વારા તેના અન્ય લોકપ્રિય રિચાર્જ પ્લાન્સ પર પણ ખાસ ઓફર્સ આપવામાં આવી રહી છે. કંપની તેના રૂ. ૨૭૯૯ વાર્ષિક પ્લાન પર વધારાની ૩૦ દિવસની વેલિડિટી આપી રહી છે, જેથી હવે આ પ્લાન ૩૬૫ દિવસના બદલે ૩૯૫ દિવસની માન્યતા સાથે કુલ ૩GB દૈનિક ડેટા અને અનલિમિટેડ કોલિંગ પૂરો પાડે છે. અગાઉ કંપનીએ રૂ. ૨૪૪૯ વાર્ષિક પ્લાનની વેલિડિટી પણ ૧૫ દિવસ વધારીને ૭૩૦GB ડેટા અને સુરક્ષા કવચ તરીકે રૂપિયા ૧ લાખનો અકસ્માત તેમજ રૂ. ૧૦,૦૦૦ નો સાયબર વીમો આપવાની જાહેરાત કરી હતી.

ટેલિકોમ બજારમાં ગ્રાહકોને આકર્ષવા માટે બીએસએનએલ દ્વારા સતત નવા અને કિફાયતી પ્લાન્સ રજૂ કરવામાં આવી રહ્યા છે. આગામી સમયમાં આ બ્રોડબેન્ડ અને પ્રીપેડ ઓફર્સને કારણે ગ્રાહકોનો સરકારી સેવાઓ તરફનો ઝુકાવ  વધુ વધવાની પૂરી સંભાવના છે, જે અન્ય ટેલિકોમ ઓપરેટર્સ માટે પણ સ્પર્ધાત્મક સાબિત થશે.