​લંડન/વોશિંગ્ટન: બ્રિટનના વડાપ્રધાન એન્ડી બર્નહામ (Andy Burnham) અને અમેરિકી રાષ્ટ્રપતિ ડોનલ્ડ ટ્રમ્પ વચ્ચે તાજેતરમાં એક મહત્વપૂર્ણ ટેલિફોનિક વાતચીત થઈ હતી. આ ફોન કોલ દરમિયાન બ્રિટિશ વડાપ્રધાને યુક્રેનને રશિયા સામેના યુદ્ધમાં મજબૂતાઈથી ટકી રહેવા માટે એલોન મસ્કની સેટેલાઇટ ઇન્ટરનેટ સર્વિસ ‘સ્ટારલિંક’ (Starlink) ની સંપૂર્ણ એક્સેસ (પહોંચ) આપવા પર ભાર મૂક્યો હતો.

​ડાઉનિંગ સ્ટ્રીટ (બ્રિટિશ વડાપ્રધાનનું કાર્યાલય) દ્વારા આપવામાં આવેલી સત્તાવાર માહિતી અનુસાર, એન્ડી બર્નહામ સ્પષ્ટ શબ્દોમાં જણાવ્યું હતું કે, રશિયન આક્રમણ સામે લડી રહેલા યુક્રેનને પોતાની સુરક્ષા માટે આ અત્યાધુનિક સેટેલાઇટ ટેક્નોલોજીનો અબાધિત ઉપયોગ મળવો અત્યંત અનિવાર્ય છે. તાજેતરમાં યુક્રેનની સ્ટારલિંક સેવામાં અચાનક ઘટાડો કે પ્રતિબંધો જોવા મળ્યા બાદ આ મુદ્દો આંતરરાષ્ટ્રીય સ્તરે ચર્ચાના કેન્દ્રમાં આવ્યો છે.

​શા માટે મહત્વનું છે આ પગલું?
​યુક્રેની સેના માટે એલોન મસ્કની સ્પેસએક્સ (SpaceX) કંપની દ્વારા સંચાલિત 'સ્ટારલિંક' સિસ્ટમ સંચાર અને ડ્રોન ઓપરેશન્સ માટે જીવાદોરી સમાન છે. તાજેતરમાં યુક્રેની અધિકારીઓએ દાવો કર્યો હતો કે કોઈપણ પૂર્વ ચેતવણી વિના તેમની સ્ટારલિંક એક્સેસ મર્યાદિત કરી દેવામાં આવી છે, જેના કારણે તેમની સૈન્ય ગતિવિધિઓ મંદ પડી છે. આ મામલે ટ્રમ્પ પ્રશાસન અને એલોન મસ્ક સામે શંકાની સોય તાકવામાં આવી રહી છે.

​આ સંવેદનશીલ મુદ્દે બ્રિટિશ વડાપ્રધાન એન્ડી બર્નહામ દ્વારા સીધી જ અમેરિકી રાષ્ટ્રપતિ સમક્ષ રજૂઆત કરવામાં આવતા આગામી સમયમાં વોશિંગ્ટન અને લંડન વચ્ચે રાજકીય ઘર્ષણ સર્જાવાના એંધાણ વર્તાઈ રહ્યા છે.

​શાંતિ વાર્તા અને અન્ય મુદ્દાઓ પર પણ ચર્ચા
​આ ફોન કોલ દરમિયાન માત્ર યુક્રેન જ નહીં, પરંતુ રશિયાના રાષ્ટ્રપતિ વ્લાદિમીર પુતિનને વાટાઘાટોના ટેબલ પર લાવવાના ડોનલ્ડ ટ્રમ્પના પ્રયાસોની પણ બર્નહામ દ્વારા પ્રશંસા કરવામાં આવી હતી. બંને નેતાઓ વચ્ચે યુદ્ધનો અંત લાવવા માટે આંતરરાષ્ટ્રીય સહયોગ વધારવા અંગે પણ સહમતિ બની હતી. આ ઉપરાંત, બંને દેશો વચ્ચે ઊર્જા ક્ષેત્રે (ખાસ કરીને ઉત્તર સમુદ્રમાં ગેસ પ્રોજેક્ટ્સ) અને અન્ય કૂટનીતિક મુદ્દાઓ પર પણ વિસ્તૃત ચર્ચાઓ કરવામાં આવી હતી.