બેંગલુરુ, તા.૧૭: રોજ સાંજે ૫ વાગ્યે ઓફિસમાં ગરમાગરમ સમોસા કે વડાપાંવ ખાવાની મજા જ કંઈક અલગ હોય છે, પરંતુ બેંગલુરુના એક કર્મચારીએ લીધેલા નિર્ણયથી આખી પેન્ટ્રીનો નકશો બદલાઈ ગયો છે અને સોશિયલ મીડિયા પર એક મોટો વિવાદ છેડાઈ ગયો છે. એક આઇટી કર્મચારીએ તેની ઓફિસના વહીવટી તંત્ર (Admin) ને સમજાવીને રોજિંદા તળેલા નાસ્તાની જગ્યાએ તાજા કાપેલા ફળોના કપ (Fruit Cups) આપવાની શરૂઆત કરાવી દીધી. આ ફેરફાર બાદ ઇન્ટરનેટ પર જાણે વિચારોનું યુદ્ધ શરૂ થઈ ગયું છે.
આ સમગ્ર ચર્ચા ત્યારે શરૂ થઈ જ્યારે આયના નારંગ નામની 'X' (ટ્વિટર) યુઝરે તેની ઓફિસ પેન્ટ્રીમાંથી સમારેલા કેળા, કેરી અને તરબૂચથી ભરેલા સુઘડ રીતે પેક કરેલા ફ્રુટ કપનો ફોટોગ્રાફ શેર કર્યો. તેણે કેપ્શનમાં લખ્યું, "ઓફિસ એડમિનને સાંજના નાસ્તા તરીકે વડાપાંવ અને સમોસાને બદલે ફળો આપવા માટે સમજાવ્યા. હવે પછીનું લક્ષ્ય ઓફિસના નાસ્તા કાઉન્ટરને બદલવાનું છે." આ પોસ્ટ જોતજોતામાં વાયરલ થઈ ગઈ અને ૧૧ લાખથી વધુ વ્યૂઝ સાથે હજારો લોકોએ તેના પર પોતાની પ્રતિક્રિયાઓ આપવાનું શરૂ કરી દીધું.
ફિટનેસ પ્રેમીઓએ નિર્ણયને બિરદાવ્યો: "રોજ સમોસા ખાવા તે શાપ સમાન"
ઘણા ફિટનેસ ફ્રીક યુઝર્સે આ અનોખી પહેલના જોરદાર વખાણ કર્યા છે. સમર્થકોનું કહેવું છે કે ભારતીય ઓફિસોમાં રોજ સાંજે તળેલા નાસ્તા પીરસવાની પ્રથા સ્વાસ્થ્ય માટે હાનિકારક છે. એક યુઝરે લખ્યું કે, "ખૂબ સરસ! રોજ રોજ સમોસા ખાવા તે સમૃદ્ધિના શાપ સમાન છે, જે ફક્ત વીકેન્ડ પર ક્યારેક જ ખાવાના હોય. ૧ સમોસામાં ૩૦૦ જેટલી કેલરી હોય છે જે તમારી આખા દિવસની કસરત પર પાણી ફેરવી દે છે."
બીજા પક્ષે પૂછ્યું: "શું મોટી માત્રામાં કાપેલા ફળો ખરેખર સુરક્ષિત છે?"
બીજી તરફ, આ નિર્ણયની ટીકા કરનારાઓની સંખ્યા પણ ઓછી નથી. ઘણા યુઝર્સે ભારતમાં પ્રી-કટ (પહેલાથી કાપેલા) ફળોની સ્વચ્છતા પર ગંભીર ચિંતાઓ વ્યક્ત કરી છે. ટીકાકારોનું કહેવું છે કે, ઓફિસમાં ભગવાન જાણે ક્યાંથી અને કેવી રીતે કાપેલા ફળો આવતા હશે! તેના કરતા તેલની અંદર ઉકળતો અને રાંધેલો ખોરાક બેક્ટેરિયા મુક્ત હોવાથી વધુ સુરક્ષિત અને સ્વચ્છ માનવામાં આવે છે.
ખોરાકની આઝાદી પર તરાપ?
સૌથી મોટો વિરોધ 'વ્યક્તિગત પસંદગી'ને લઈને થઈ રહ્યો છે. ઓફિસના અન્ય કર્મચારીઓએ નારાજગી વ્યક્ત કરતા કહ્યું કે, કોઈના પર પણ તેની ઈચ્છા વિરુદ્ધ હેલ્ધી ફૂડ લાદવું જોઈએ નહીં. અમને અમારો મનપસંદ નાસ્તો પસંદ કરવાની છૂટ હોવી જોઈએ. આ વાયરલ પોસ્ટે હવે કોર્પોરેટ સુખાકારી, કર્મચારીઓની પસંદગીની સ્વતંત્રતા અને સ્વચ્છતાના ધોરણો અંગે એક નવી વૈશ્વિક ચર્ચાને જન્મ આપ્યો છે.