મુંબઈ, તા.૦૨: દિવંગત અભિનેતા સુશાંત સિંહ રાજપૂતના પૂર્વ મેનેજર દિશા સલિયનના રહસ્યમય મૃત્યુ કેસમાં બોમ્બે હાઈકોર્ટે એક મોટો અને ઐતિહાસિક આદેશ આપ્યો છે. કોર્ટે આ સમગ્ર કેસની તપાસ સેન્ટ્રલ બ્યુરો ઓફ ઇન્વેસ્ટિગેશન (CBI) ને સોંપવાનો નિર્દેશ આપ્યો છે અને એજન્સીને તાત્કાલિક એફઆઈઆર નોંધવા કહ્યું છે. આ ન્યાયિક પગલાં બાદ દિશાના પિતા સતીશ સલિયને જણાવ્યું હતું કે તેમને સંપૂર્ણ ૧૦૦% આશા છે કે આખરે તેમની પુત્રીના મૃત્યુનું સાચું રહસ્ય બહાર આવશે.

લગભગ છ વર્ષ લાંબી કાનૂની લડાઈને યાદ કરતા સતીશ સલિયને ભાવુક થઈને કહ્યું કે તેઓ એફઆઈઆર નોંધાયા વિના ઘરે જઈને રડશે નહીં અને જ્યાં સુધી ન્યાય નહીં મળે ત્યાં સુધી પોતાની લડાઈ ચાલુ રાખશે. તેમણે અગાઉની ફરિયાદમાં નામ આપવામાં આવેલા તમામ શંકાસ્પદ લોકો સામે કડક કાર્યવાહી કરવાની અને એફઆઈઆર નોંધવાની માંગણી દોહરાવી હતી.

કોર્ટનો આદેશ અને વકીલના ગંભીર આક્ષેપો

બોમ્બે હાઈકોર્ટના જસ્ટિસ સારંગ કોટવાલની આગેવાની હેઠળની બેન્ચે મુંબઈના CBI ઇન્ચાર્જને તપાસ અધિકારીની નિમણૂક કરવા અને તમામ પાસાઓની ઝીણવટભરી તપાસ કરવાનો નિર્દેશ આપ્યો છે. કોર્ટે માલવાણી પોલીસને તમામ સંબંધિત દસ્તાવેજો અને પુરાવાઓ CBI ને સોંપવા કહ્યું છે.

બીજી તરફ, પરિવારના વકીલ નીલેશ ઓઝાએ આ કેસમાં આદિત્ય ઠાકરે, સૂરજ પંચોલી, દીનો મોરિયા, રિયા ચક્રવર્તી, સચિન વાઝે અને પરમબીર સિંહ સહિતના દિગ્ગજો પર ગંભીર આક્ષેપો કરતા તેમને મુખ્ય આરોપી તરીકે નામબદ્ધ કરવાની માંગ કરી છે. ઉલ્લેખનીય છે કે ૮ જૂન, ૨૦૨૦ ના રોજ મલાડમાં એક બિલ્ડિંગના ૧૪મા માળેથી પડી જવાથી દિશાનું મોત થયું હતું, જેને મુંબઈ પોલીસે અકસ્માત ગણાવ્યો હતો, પરંતુ પરિવારની સતત લડાઈને કારણે હવે આ કેસમાં નવો વળાંક આવ્યો છે.