ભટિંડા | તા.૦૩: પંજાબના ભટિંડામાંથી એક અત્યંત સનસનાટીભર્યા સમાચાર સામે આવ્યા છે. ગુરુવારે ભટિંડા જિલ્લા કોર્ટ અને જિલ્લા પરિષદ કાર્યાલયને બોમ્બથી ઉડાવી દેવાની ભયાનક ધમકી આપતો એક અનામી ઈમેઈલ મળતાં સમગ્ર પંજાબમાં અફરાતફરી અને ગભરાટનો માહોલ સર્જાયો હતો. એક જ અઠવાડિયામાં બીજી વખત આવી ધમકી મળવાને કારણે સુરક્ષા એજન્સીઓ તુરંત જ સતર્ક થઈ ગઈ હતી અને બંને પરિસરોને તાત્કાલિક ખાલી કરાવવામાં આવ્યા હતા.

ધમકીભર્યા ઈમેઈલમાં કથિત રીતે ખાલિસ્તાની સંગઠનો સાથેની લિંક્સ હોવાનો દાવો કરવામાં આવતાં મામલાની ગંભીરતા વધી ગઈ હતી. માહિતી મળતાં જ પોલીસનો મોટો કાફલો, બોમ્બ ડિસ્પોઝલ સ્કવોડ અને ડોગ સ્કવોડની ટીમો ઘટનાસ્થળે ધસી ગઈ હતી. આખા કોર્ટ પરિસર અને જિલ્લા પરિષદ કાર્યાલયને કોર્ડન કરી લેવામાં આવ્યું હતું અને ખૂણે-ખૂણે સઘન સર્ચ ઓપરેશન હાથ ધરવામાં આવ્યું હતું. કલાકો સુધી ચાલેલી તપાસ બાદ કોઈ શંકાસ્પદ વસ્તુ કે બોમ્બ મળી આવ્યો ન હતો, જેનાથી પોલીસ વહીવટીતંત્રે રાહતનો શ્વાસ લીધો હતો.

ધમકીના પગલે સમગ્ર ભટિંડા શહેરમાં સુરક્ષા વ્યવસ્થા અત્યંત આકરી કરી દેવામાં આવી છે. કોર્ટ અને સરકારી કચેરીઓમાં આવતા-જતા દરેક મુલાકાતીઓનું કડક ચેકિંગ કરવામાં આવી રહ્યું છે. પોલીસે આ મામલે ટેકનિકલ તપાસ શરૂ કરી દીધી છે અને ઈમેઈલ મોકલનારનું આઈપી સરનામું (IP Address) ટ્રેસ કરવાના પ્રયાસો ચાલુ છે. પોલીસ અધિકારીઓએ સામાન્ય જનતાને શાંતિ જાળવવા, કોઈ પણ પ્રકારની અફવાઓ પર ધ્યાન ન આપવા અને શંકાસ્પદ પ્રવૃત્તિ કે વસ્તુ જણાય તો તાત્કાલિક પોલીસને જાણ કરવા અપીલ કરી છે.