મુંબઈ: બૉલીવુડ ફિલ્મ ઇન્ડસ્ટ્રીમાં પોતાની દરેક ફિલ્મમાં જીવ રેડી દેવા માટે જાણીતા અને 'મિસ્ટર પરફેક્શનિસ્ટ' તરીકે ઓળખાતા સુપરસ્ટાર આમિર ખાને (Aamir Khan) પોતાની ફિલ્મી સફર અને વર્ષોથી લાગતા ગંભીર આરોપો પર આખરે એક ઇન્ટરવ્યુમાં વિસ્ફોટક ખુલાસો કર્યો છે. બૉલીવુડના ગલિયારાઓમાં અવારનવાર એવી ચર્ચા અને અફવાઓ ઉડતી હોય છે કે આમિર ખાન સેટ પર વાસ્તવિક ડિરેક્ટરના કામમાં દખલગીરી કરે છે અને પડદા પાછળ પોતે જ બધું સંભાળે છે, જેને સિનેમાની ભાષામાં 'ઘોસ્ટ ડિરેક્ટિંગ' (Ghost Directing) કહેવાય છે. હવે 61 વર્ષની ઉંમરે પહોંચેલા અભિનેતાએ મીડિયા સામે આવીને આ તમામ વાહિયાત દાવાઓને આકરા શબ્દોમાં નકારી કાઢ્યા છે.
આમિર ખાને પત્રકારો સાથે વાતચીત દરમિયાન અત્યંત ગુસ્સા અને આશ્ચર્ય સાથે જણાવ્યું કે, "સૌ પ્રથમ તો દુનિયાએ એ સમજવું પડશે કે મેં મારી 38 વર્ષની લાંબી કારકિર્દીમાં જેટલી પણ ફિલ્મો કરી છે, તેમાંથી મેં સત્તાવાર અને વાસ્તવિક રીતે માત્ર એક જ ફિલ્મનું દિગ્દર્શન કર્યું છે અને તે છે 'તારે જમીન પર'. આ સિવાય મેં ક્યારેય કોઈ બીજી ફિલ્મ ડાયરેક્ટ કરી નથી, પછી ભલે મીડિયા ગમે તેવા મનઘડંત દાવા કરતું રહે."
"શું મને પાગલ કૂતરાએ કરડ્યો છે?" આમિરનો સણસણતો સવાલ
મીડિયામાં સતત ચાલતા આક્ષેપો પર કટાક્ષ કરતા આમિરે વધુમાં ઉમેર્યું કે, "જો હું પડદા પાછળ રહીને આટલું સરસ અને તકલીફવાળું કામ કરી રહ્યો હોઉં, તો પછી હું તેનું ક્રેડિટ પોતે લેવાના બદલે બીજા કોઈ દિગ્દર્શકને શા માટે આપી દઉં? શું મને કોઈ પાગલ કૂતરાએ કરડ્યો છે? આ તદ્દન બકવાસ વાત છે. હું મારી કારકિર્દીમાં એવા ફિલ્મમેકર્સ સાથે કામ કરવા માટે નસીબદાર રહ્યો છું જેઓ અતિશય પ્રતિભાશાળી હતા અને જેમની પાસેથી મને ઘણું બધું શીખવા મળ્યું છે."
જો બધું મેં કર્યું હોત, તો 'લગાન' અને '3 ઇડિયટ્સ' એકસરખી હોત!
અભિનેતાએ પોતાના તર્ક આપતા સમજાવ્યું કે તેણે જે પણ ફિલ્મ નિર્માતાઓ સાથે કામ કર્યું છે તેઓ પ્રોજેક્ટ્સમાં પોતાની એક અનોખી ઉર્જા અને દ્રષ્ટિકોણ લઈને આવ્યા છે. તેમણે જણાવ્યું કે, "જો મેં મારી બધી ફિલ્મોમાં પોતે જ ભૂતિયા દિગ્દર્શક તરીકે નિર્ણયો લીધા હોત, તો મારી બધી ફિલ્મો એકસરખી જ દેખાતી હોત. તેમની અંદરની ભાવના, કલર-ટોન અને આત્મા એક સમાન હોત. પરંતુ વાસ્તવિકતામાં એવું નથી. મારી ફિલ્મ 'લગાન' એ 'રંગ દે બસંતી' થી સંપૂર્ણપણે અલગ છે અને 'સરફરોશ' એ '3 ઇડિયટ્સ' કે 'દંગલ' થી બિલકુલ જુદી છે, કારણ કે દરેક ડિરેક્ટરે ફિલ્મમાં પોતાનું વ્યક્તિત્વ રેડ્યું છે."
કારકિર્દીની શરૂઆતમાં 'એક ફિલ્મની અજાયબી' નો લાગ્યો હતો ટેગ:
ઉલ્લેખનીય છે કે "કયામત સે કયામત તક" ની પ્રચંડ સફળતા પછી આમિર ખાને એકસાથે 9 જેટલી ફિલ્મો સાઇન કરી નાખી હતી, જે બોક્સ ઓફિસ પર ઉપરાઉપરી ફ્લોપ ગઈ હતી. આ નિષ્ફળતા બાદ લોકો તેને 'વન ફિલ્મ વન્ડર' કહેવા લાગ્યા હતા. પરંતુ આમિરે હિંમત હાર્યા વિના પોતાનો અભિગમ બદલ્યો અને વર્ષમાં માત્ર એક જ ઉત્કૃષ્ટ સ્ક્રિપ્ટ પર કામ કરવાનું શરૂ કર્યું, જે નિર્ણયોએ તેમની કિસ્મત અને આખું બૉલીવુડ બદલી નાખ્યું હતું.
અંતમાં આમિર ખાને ભારપૂર્વક કહ્યું કે કોઈ પણ ફિલ્મની સફળતા પાછળ લેખકો, દિગ્દર્શકો અને આખી ક્રિએટિવ ટીમની મહેનત હોય છે અને શ્રેય પણ તેમને જ મળવો જોઈએ. મેં ક્યારેય 'તલાશ' કે 'રંગ દે બસંતી' ની સ્ક્રિપ્ટ લખી નથી, હું માત્ર એક કલાકાર તરીકે વાર્તાથી પ્રભાવિત થઈને તેનો એક ભાગ બન્યો હતો.