મુંબઈ : બોલિવૂડ જગતમાંથી એક અત્યંત ચોંકાવનારી અને સનસનીખેજ ખબર સામે આવી છે. અભિનેતા ટાઈગર શ્રોફ પર તાજેતરમાં થયેલી ગોળીબારની ઘટનાએ સમગ્ર હિન્દી ફિલ્મ ઉદ્યોગને હચમચાવી દીધો છે. આ ખતરનાક ઘટના બાદ માત્ર સલમાન ખાન જ નહીં, પરંતુ બોલિવૂડના ખેલાડી કુમાર એટલે કે અક્ષય કુમારે પણ પોતાની અને પરિવારની સુરક્ષાને અત્યંત ગંભીરતાથી લીધી છે. મીડિયા અહેવાલો મુજબ, મુંબઈના જુહુ સ્થિત અક્ષય કુમારના ઘર પર સુરક્ષાના ભાગરૂપે ખાસ બુલેટપ્રૂફ ગ્લાસ શીલ્ડ લગાવવાની કામગીરી શરૂ કરી દેવામાં આવી છે, જોકે આ અંગે હજુ સુધી કોઈ સત્તાવાર પુષ્ટિ કરવામાં આવી નથી.

ઉલ્લેખનીય છે કે ગત રવિવારે જ્યારે ટાઈગર શ્રોફ ફૂટબોલ રમીને મેદાનમાંથી બહાર આવી રહ્યા હતા, ત્યારે અજ્ઞાત હુમલાખોરો દ્વારા તેમના પર અચાનક ગોળીબાર કરવામાં આવ્યો હતો. આ ભયાનક હુમલામાં ટાઈગર શ્રોફ સદનસીબે બચી ગયા હતા અને તેમને સામાન્ય ઈજાઓ થઈ હતી, પરંતુ તેમના ડ્રાઈવરને ગોળી વાગવાથી ઈજા પહોંચી હતી. આ ઘટના બાદ રાજસ્થાન એન્ટી-ગેંગસ્ટર ટાસ્ક ફોર્સે ત્વરિત કાર્યવાહી કરીને કોટા રેલવે સ્ટેશનથી ટ્રેન દ્વારા ભાગી રહેલા ત્રણેય આરોપીઓને ઝડપી પાડ્યા હતા અને તેમને મુંબઈ પોલીસની ક્રાઈમ બ્રાન્ચને સોંપી દીધા છે.

આ ગંભીર ઘટના વચ્ચે ટાઈગર શ્રોફની સત્તાવાર ટીમ દ્વારા એક કડક નિવેદન જારી કરવામાં આવ્યું છે. જેમાં ચાહકો અને સોશિયલ મીડિયા યૂઝર્સને ચેતવણી આપવામાં આવી છે કે તેઓ અભિનેતાના નામે કોઈપણ પ્રકારની બનાવટી કે ભ્રામક સામગ્રી (fabricated content) ન બનાવે કે ફેલાવે નહીં. ટીમ દ્વારા સ્પષ્ટ કરવામાં આવ્યું છે કે જો કોઈ વ્યક્તિ આવી અફવાઓ ફેલાવતા પકડાશે તો તેની સામે કડક કાયદેસરની કાર્યવાહી કરવામાં આવશે. અક્ષય કુમાર અને ટાઈગર શ્રોફે અગાઉ 'બડે મિયાં છોટે મિયાં' ફિલ્મમાં સાથે કામ કર્યું છે અને બંને વચ્ચે ગાઢ મિત્રતા છે, ત્યારે બોલિવૂડમાં વધેલી આ સુરક્ષા ચિંતાઓએ સમગ્ર ફિલ્મ ઈન્ડસ્ટ્રીમાં હડકંપ મચાવી દીધો છે.