મુંબઈ:ભારતીય સંગીત જગતની સૌથી બહુમુખી અને સુપ્રસિદ્ધ ગાયિકા આશા ભોંસલેના ૯૨ વર્ષની વયે થયેલા નિધને સમગ્ર સિને જગતને શોકમાં ગરકાવ કરી દીધું છે. મુંબઈની બ્રીચ કેન્ડી હોસ્પિટલમાં જ્યારે આશા તાઈએ અંતિમ શ્વાસ લીધા, ત્યારે માત્ર એક ગાયિકા જ નહીં પણ ભારતીય સિનેમાના પ્રાણ સમાન અવાજનો અસ્ત થયો છે. આ સમાચાર વાયુવેગે ફેલાતા જ બોલિવૂડની હસ્તીઓએ સોશિયલ મીડિયા પર શ્રદ્ધાંજલિનો ધોધ વહાવ્યો હતો. ફિલ્મ નિર્માતા કરણ જોહરે અત્યંત ભાવુક થતા જણાવ્યું હતું કે, આશાજીનું જવું એ માત્ર એક કલાકારનો અંત નથી પરંતુ ભારતીય સંગીતના એક અવિસ્મરણીય યુગનો વિરામ છે. તેમના અવાજમાં જે મધુરતા અને વિવિધતા હતી, તે આવનારી અનેક પેઢીઓ માટે એક પાઠશાળા બની રહેશે.

પીઢ અભિનેત્રી હેમા માલિનીએ આશાજી સાથેના તેમના દાયકાઓ જૂના સંબંધોને યાદ કરતા કહ્યું કે, તેમના અવાજે પડદા પર મારા પાત્રોને અમર બનાવી દીધા છે. મંગેશકર બહેનો સાથેનો તેમનો ભાવનાત્મક નાતો ફિલ્મી દુનિયાના વ્યવસાયિક સંબંધો કરતા ઘણો ઉપર હતો. તો બીજી તરફ, અભિનેતા અક્ષય કુમારે શ્રદ્ધાંજલિ અર્પતા કહ્યું કે આશાજીનો અવાજ હંમેશા અમર રહેશે અને સંગીત પ્રેમીઓ તેમને ક્યારેય ભૂલી શકશે નહીં. અભિનેત્રી રવિના ટંડને આશાજીને પોતાની પ્રેરણા ગણાવી હતી, જ્યારે હાસ્ય કલાકાર જેમી લીવરે આશાજીના લાઈવ કોન્સર્ટની યાદો વાગોળતા કહ્યું કે, દુનિયામાં આશા ભોંસલે જેવો બીજો કોઈ અવાજ ન હોઈ શકે.

આશા ભોંસલેની સાત દાયકા લાંબી કારકિર્દી એ ભારતીય સંગીતના પરિવર્તનની સાક્ષી રહી છે. ઓ.પી. નૈયરના પશ્ચિમી લય હોય કે આર.ડી. બર્મનના પ્રયોગશીલ ગીતો, આશાજીએ દરેક શૈલીને નવો આયામ આપ્યો હતો. કેબરે ગીતોથી લઈને અત્યંત ગંભીર ગઝલો સુધીની તેમની સફર આજના ગાયકો માટે માર્ગદર્શક છે. તેમની વિદાયથી સંગીતની સીમાઓ ઓળંગનાર એક વૈશ્વિક નાયિકાની ખોટ ક્યારેય પુરાશે નહીં. જોકે, બોલિવૂડના તમામ કલાકારોએ એકસૂરે સ્વીકાર્યું છે કે ભલે આશા તાઈ આજે આપણી વચ્ચે સદેહે હાજર નથી, પરંતુ તેમના હજારો સદાબહાર ગીતો દ્વારા તેઓ સંગીત પ્રેમીઓના હૃદયમાં હંમેશા જીવંત રહેશે. મુંબઈ આજે એક એવી હસ્તીને વિદાય આપી રહ્યું છે જેણે સાચા અર્થમાં ભારતીય સંગીતને વૈશ્વિક ઓળખ અપાવી હતી.