મુંબઈ :બોલિવૂડની જાણીતી અભિનેત્રી નુસરત ભરૂચા ઇન્ડોનેશિયાના પ્રખ્યાત ટાપુ પ્રાંત બાલીમાં એક પ્રોજેક્ટના શૂટિંગ દરમિયાન ગંભીર અકસ્માતનો ભોગ બની છે. શૂટિંગ સેટ પર અચાનક બનેલી આ ઘટનામાં અભિનેત્રી ઈજાગ્રસ્ત થતાં તેને તાત્કાલિક નજીકની ખાનગી હોસ્પિટલમાં દાખલ કરવામાં આવી છે, જ્યાં તબીબોની દેખરેખ હેઠળ તેની સઘન સારવાર ચાલી રહી છે.

'પ્યાર કા પંચનામા' અને 'આકાશવાણી' જેવી સફળ ફિલ્મો દ્વારા દર્શકોના દિલ જીતનારી ટેલેન્ટેડ એક્ટ્રેસ નુસરત ભરૂચા હાલ વિદેશી ધરતી પર મુશ્કેલીમાં મુકાઈ છે. મીડિયા રિપોર્ટ્સ અનુસાર, નુસરત છેલ્લા કેટલાક દિવસોથી ઇન્ડોનેશિયાના બાલીમાં પોતાના આગામી આંતરરાષ્ટ્રીય પ્રોજેક્ટના આઉટડોર શૂટિંગમાં વ્યસ્ત હતી.

કામ દરમિયાન અચાનક એક અણધારી દુર્ઘટના સર્જાઈ હતી, જેમાં અભિનેત્રી શારીરિક રીતે ઈજાગ્રસ્ત થઈ હતી. પરિસ્થિતિની ગંભીરતા જોતાં સેટ પર હાજર પ્રોડક્શન ટીમે તાત્કાલિક શૂટિંગ અટકાવી દીધું હતું અને તેને વિલંબ કર્યા વગર સ્થાનિક પ્રાઇવેટ હોસ્પિટલમાં ખસેડી હતી.

અભિનેત્રી હોસ્પિટલમાં દાખલ થવાના સમાચારે સમગ્ર ફિલ્મ ઇન્ડસ્ટ્રી અને તેના ચાહકોને સ્તબ્ધ કરી દીધા છે. જોકે આ ઘટના અંગે હજુ ઘણી વિગતો સ્પષ્ટ થવાની બાકી છે.

આ પહેલીવાર નથી જ્યારે નુસરત ભરૂચા પોતાની ફિલ્મો સિવાય કોઈ અણધારી ઘટનાને કારણે ચર્ચામાં આવી હોય. અગાઉ મિડલ ઈસ્ટમાં ઇઝરાયલ અને હમાસ વચ્ચે ફાટી નીકળેલા ભીષણ યુદ્ધ દરમિયાન નુસરત હાઈફા ઇન્ટરનેશનલ ફિલ્મ ફેસ્ટિવલમાં ભાગ લેવા ગઈ હતી અને ત્યાં યુદ્ધગ્રસ્ત વિસ્તારમાં ફસાઈ ગઈ હતી.

તે સમયે ભારત સરકાર અને ભારતીય દૂતાવાસના ત્વરિત પ્રયાસો દ્વારા અભિનેત્રીનું સલામત રેસ્ક્યુ કરીને સ્પેશિયલ ફ્લાઇટ મારફતે સુરક્ષિત ભારત પરત લાવવામાં આવી હતી. તે ઘટનાના ધ્રુજારીજનક અનુભવ બાદ હવે બાલીમાં બનેલી અકસ્માતની આ ઘટનાએ તેના નજીકના પરિજનો અને મિત્રોની ચિંતામાં ફરી વધારો કર્યો છે.

આ સમાચાર સોશિયલ મીડિયા પર વાયરલ થતાં જ ફેન્સ નુસરતના ઝડપી સ્વાસ્થ્ય સુધારા માટે પ્રાર્થના કરી રહ્યા છે. સોશિયલ મીડિયા પ્લેટફોર્મ્સ પર શુભકામનાઓની લહેર જોવા મળી રહી છે.

હાલ સુધી અભિનેત્રી કે તેની પીઆર ટીમ તરફથી કોઈ ઓફિશિયલ હેલ્થ સ્ટેટમેન્ટ બહાર પાડવામાં આવ્યું નથી. સૂત્રોના જણાવ્યા અનુસાર, પરિવારના સભ્યો બાલી જવા રવાના થઈ રહ્યા છે અને ટૂંક સમયમાં મેડિકલ ટીમ દ્વારા સત્તાવાર અપડેટ જાહેર કરવામાં આવે તેવી શક્યતા છે.