નવી દિલ્હી, તા.૦૭: દેશની સર્વોચ્ચ અદાલતમાં આશરે ૧૬ વર્ષ જૂના નાણાકીય વિવાદ અને ચેક બાઉન્સ કેસની સુનાવણી દરમિયાન જાણીતા બૉલિવૂડ અભિનેતા રાજપાલ યાદવે ભારે દુઃખ વ્યક્ત કરતા પોતાની નાણાકીય લાચારી વ્યક્ત કરી હતી. સુપ્રીમ કોર્ટના જસ્ટિસ સૂર્ય કાંતની ખંડપીઠ સમક્ષ હાથ ધરાયેલી આ સુનાવણીમાં કોર્ટે કડક વલણ અપનાવીને રાજપાલ યાદવને બાકી નીકળતી રકમ પૈકી રૂ. ૧ કરોડ ૧૫ લાખ જમા કરાવવા તેમજ સોમવાર સુધીમાં બાકીના ૮૫ લાખ રૂપિયા આરટીજીએસ (RTGS) મારફતે જમા કરાવવાનો આદેશ આપ્યો હતો.

સુનાવણી દરમિયાન જસ્ટિસ સૂર્ય કાંતે હળવા અંદાજમાં રાજપાલ યાદવને પૂછ્યું હતું કે, "તમે કોઈ નવી સીરિયલ કે ફિલ્મ બનાવી રહ્યા છો કે નહીં?" આ સવાલના જવાબમાં અભિનેતાએ અત્યંત ભાવુક થઈને કોર્ટ સમક્ષ કહ્યું હતું કે, "મેં ૧૬ વર્ષમાં ૨૫૦થી વધુ ફિલ્મો કરી છે, પરંતુ વર્ષ ૨૦૧૦ની ફિલ્મ 'અતા પતા લાપતા'માં રૂ. ૫ કરોડ રોક્યા બાદ મારા કુલ ૧૭ કરોડ રૂપિયા ડૂબી ગયા છે."

અભિનેતાએ પોતાની વેદના ઠાલવતા અદાલતને જણાવ્યું હતું કે, આ ચક્કરમાં તેમને કુલ ૨૨ કરોડ રૂપિયાનું ભારે નુકસાન વેઠવું પડ્યું છે અને તે ફિલ્મમાંથી એક રૂપિયો પણ કમાઈ શકાયો નહોતો. તેમણે કોર્ટ સમક્ષ આજીજી કરતા ઉમેર્યું હતું કે, "તમે જ્યારે પણ ઇચ્છો અને જ્યાં પણ મોકલવા માંગો, હું જવા માટે તૈયાર છું." અદાલતે માહોલ હળવો કરવાનો પ્રયાસ કરતાં તેમને કોઈ સારી ફિલ્મ બનાવવા અને વકીલોમાંથી સારા કલાકારો પસંદ કરવા રમુજી સૂચન પણ કર્યું હતું.

આ સમગ્ર વિવાદની શરૂઆત વર્ષ ૨૦૧૦માં થઈ હતી, જ્યારે રાજપાલ યાદવે પોતાની ફિલ્મ 'અતા પતા લાપતા'ના નિર્માણ માટે દિલ્હી સ્થિત મુરલી પ્રોજેક્ટ્સ પ્રાઇવેટ લિમિટેડ પાસેથી રૂ. ૫ કરોડની લોન લીધી હતી. વર્ષ ૨૦૧૨માં ફિલ્મ રિલીઝ થઈ હતી પરંતુ બોક્સ ઓફિસ પર નિષ્ફળ નીવડી હતી. નાણાં પરત ચૂકવવા અંગે વિવાદ વકરતા યાદવ દ્વારા આપવામાં આવેલા ૭ ચેક બાઉન્સ થયા હતા, જેના કારણે લીગલ નોટિસ અને કોર્ટ કેસની કાર્યવાહી શરૂ થઈ હતી.

વર્ષ ૨૦૧૨માં બંને પક્ષો વચ્ચે વ્યાજ સાથે આશરે ૧૧ કરોડ રૂપિયા ચૂકવવાની સમજૂતી થઈ હતી, પરંતુ તેનું પાલન ન થતાં કેસ લંબાતો ગયો હતો. વર્ષ ૨૦૧૮માં દિલ્હીની ટ્રાયલ કોર્ટે રાજપાલ યાદવને આ કેસમાં દોષિત ઠેરવ્યા હતા. ત્યાર બાદ દિલ્હી હાઈકોર્ટે જુલાઈ ૨૦૨૬માં તેમની ત્રણ મહિનાની જેલની સજા યથાવત રાખવાનો ચુકાદો આપ્યો હતો, જેની સામે તેમણે સુપ્રીમ કોર્ટના દ્વાર ખટખટાવ્યા હતા.

હવે સુપ્રીમ કોર્ટના કડક આદેશ બાદ સોમવાર સુધીમાં નિયત રકમ જમા કરાવવી રાજપાલ યાદવ માટે અનિવાર્ય બની ગઈ છે. જો તેઓ નિર્ધારિત સમયમર્યાદામાં રકમ જમા કરાવવામાં નિષ્ફળ રહેશે તો તેમની જેલ જવાની શક્યતાઓ વધી જશે. આગામી સપ્તાહમાં જમા થનારી રકમ અને કોર્ટના અંતિમ વલણ પર સૌની નજર ટકેલી છે.