નવી દિલ્હી, તા.૨૯: ભાજપના સાંસદ બાંસુરી સ્વરાજ દ્વારા કોંગ્રેસ નેતા રાહુલ ગાંધીને 'વંદે માતરમ' ગાવા અંગે ફેંકવામાં આવેલા પડકારનો મામલો હવે સોશિયલ મીડિયા પર ચર્ચાનું કેન્દ્ર બન્યો છે. આ વિવાદ વચ્ચે બોલિવૂડના સુપરસ્ટાર હૃતિક રોશને આશ્ચર્ય વ્યક્ત કરતી પ્રતિક્રિયા આપતા આ મામલો વધુ ચર્ચામાં આવ્યો છે. લગભગ એક મહિના જૂના આ વાયરલ વીડિયોએ હવે મનોરંજન અને રાજકીય બંને જગતમાં હલચલ મચાવી દીધી છે.

શું છે સમગ્ર વિવાદ અને બાંસુરી સ્વરાજનું નિવેદન?

થોડા સમય પહેલા પુણેમાં યોજાયેલા 'છત્ર કી ગૂંજ' કાર્યક્રમમાં ભાજપના દિલ્હીના સાંસદ બાંસુરી સ્વરાજે રાહુલ ગાંધીના એક નિવેદનનો આક્રમક જવાબ આપ્યો હતો. રાહુલ ગાંધીએ પોતાના ભાષણમાં મનુસ્મૃતિની માનસિકતા અને પિતૃસત્તા સામે લડવાની વાત કરી હતી. તેના જવાબમાં બાંસુરી સ્વરાજે કટાક્ષ કરતા રાહુલ ગાંધીને પડકાર ફેંક્યો હતો કે, "જો તમે ખરેખર પિતૃસત્તાનો અંત લાવવા માંગતા હો, તો માત્ર વાતો કરવાને બદલે આખું 'વંદે માતરમ' ગાઈને બતાવો." આ વીડિયો કોંગ્રેસના સોશિયલ મીડિયા સંયોજક રુચિરા ચતુર્વેદી દ્વારા સોશિયલ મીડિયા પર શેર કરવામાં આવ્યો હતો.

હૃતિક રોશનની પ્રતિક્રિયા પર સોશિયલ મીડિયામાં યુઝર્સની મઝેદાર કોમેન્ટ્સ

કોંગ્રેસ નેતા દ્વારા શેર કરાયેલી આ પોસ્ટ પર બોલિવૂડ અભિનેતા હૃતિક રોશને આશ્ચર્ય વ્યક્ત કરતા ટિપ્પણી કરી હતી કે, "હં? શું ખરેખર આવું થયું? વાહ." હૃતિકની આ ટિપ્પણી વાયરલ થતાં જ સોશિયલ મીડિયા યુઝર્સે તેના પર વિવિધ પ્રતિક્રિયાઓ આપવાનું શરૂ કરી દીધું હતું. એક યુઝરે તેમની સુપરહીરો ફિલ્મ 'ક્રિશ'નો ઉલ્લેખ કરીને મજાકમાં લખ્યું કે "રાજા, તમારી અંદરના ક્રિશને બહાર લાવો," જ્યારે અન્ય યુઝર્સે આ મુદ્દે રાજકીય અને હાસ્યરસિક કોમેન્ટ્સ કરી હતી. આ ઘટનાએ સોશિયલ મીડિયા પર એક નવી ચર્ચા છેડી દીધી છે.