એથેન્સ : ગ્રીસના ક્રીટ ટાપુની દક્ષિણે યુરોપિયન યુનિયનમાં પ્રવેશવા માટે ભૂમધ્ય સમુદ્ર પાર કરી રહેલા શરણાર્થીઓની બે હોડીઓમાંથી ઓછામાં ઓછા ૨૦ પ્રવાસીઓના મૃતદેહો મળી આવતા આંતરરાષ્ટ્રીય સ્તરે ભારે હાહાકાર મચી ગયો છે.

પ્રાપ્ત વિગતો અનુસાર, સોમવારે વહેલી સવારે હેલેનિક કોસ્ટ ગાર્ડ અને ફ્રોન્ટેક્સ દ્વારા સંયુક્ત રીતે હાથ ધરવામાં આવેલી બચાવ કામગીરી દરમિયાન ક્રીટ ટાપુથી આશરે ૨૮ કિલોમીટર દૂર બે અલગ-અલગ હોડીઓમાંથી કુલ ૨૦ શબ મળી આવ્યા હતા.

કોસ્ટ ગાર્ડના જણાવ્યા મુજબ, એક હોડીમાંથી ૮ અને બીજી હોડીમાંથી ૧૨ મૃતદેહો મળી આવ્યા હતા, જ્યારે આ જ ઓપરેશન દરમિયાન મોરોક્કોના ધ્વજવાળા કન્ટેનર જહાજ અને જોઈન્ટ રેસ્ક્યુ કોઓર્ડિનેશન સેન્ટરની મદદથી અન્ય ૪૦ લોકોને સુરક્ષિત રીતે બચાવી લેવામાં આવ્યા હતા.

આ દુર્ઘટના કયા સંજોગોમાં સર્જાઈ અને મૃત્યુ પામેલા પ્રવાસીઓની ઓળખ તથા તેમની રાષ્ટ્રીયતા શું હતી તે અંગે હજુ સુધી ગ્રીક સત્તાવાળાઓ દ્વારા કોઈ સત્તાવાર સ્પષ્ટતા કરવામાં આવી નથી, પરંતુ આ માર્ગ પર વધતા જોખમો સામે ફરી એકવાર ગંભીર સવાલો ઊભા થયા છે.

યુરોપ તરફ જતા આ શરણાર્થીઓ માટે આ દરિયાઈ માર્ગ અત્યંત જોખમી સાબિત થઈ રહ્યો છે અને અગાઉ પણ અનેક વખત આવી જીવલેણ દુર્ઘટનાઓ સામે આવી ચૂકી છે, જે માનવ તસ્કરી અને ગેરકાયદેસર સ્થળાંતર સામે કડક પગલાં લેવાની આવશ્યકતા દર્શાવે છે.

આગામી સમયમાં ગ્રીક અધિકારીઓ દ્વારા આ મામલે સઘન તપાસ હાથ ધરવામાં આવશે અને મૃતકોના વાસ્તવિક કારણો તેમજ બચી ગયેલા પ્રવાસીઓની પૂછપરછ બાદ વધુ વિગતો જાહેર કરવામાં આવશે તેવી સંભાવના છે.