​ખૈબર પખ્તુનખ્વા: પાકિસ્તાનમાં ફરી એકવાર આતંકવાદનું કાળું તાંડવ જોવા મળ્યું છે. ખૈબર પખ્તુનખ્વા પ્રાંતના લોઅર દીર અને બન્નૂ જિલ્લામાં બુધવારે થયેલા બે ભયાનક આતંકવાદી હુમલાઓએ પાકિસ્તાનની સુરક્ષા વ્યવસ્થાની પોલ ખોલી નાખી છે. આ હિંસક ઘટનાઓમાં ૩ પોલીસકર્મીઓએ ફરજ દરમિયાન શહાદત વહોરી છે, જ્યારે ૩૪થી વધુ લોકો ગંભીર રીતે ઘાયલ થતા સમગ્ર વિસ્તારમાં દહેશતનો માહોલ છવાઈ ગયો છે.

​પ્રાપ્ત વિગતો અનુસાર, લોઅર દીર જિલ્લાના હૈદર વિસ્તારમાં લાદમ ટોપ નજીકથી પસાર થઈ રહેલા પોલીસ કાફલાને નિશાન બનાવીને આતંકવાદીઓએ અચાનક હુમલો કર્યો હતો. આ હુમલામાં આતંકવાદીઓએ આડેધડ હેન્ડ ગ્રેનેડ અને આધુનિક હથિયારોનો ઉપયોગ કર્યો હતો. આ હિંસક અથડામણમાં પોલીસના બે વાહનો સંપૂર્ણપણે બળીને ખાખ થઈ ગયા હતા. આ દુખદ ઘટનામાં ૩ પોલીસકર્મીઓના મોત નીપજ્યા છે, જ્યારે ૧૯ જવાનો ઈજાગ્રસ્ત થયા છે.

​બીજી તરફ, બન્નૂ જિલ્લાના મિરયાન પોલીસ સ્ટેશનને નિશાન બનાવીને આતંકવાદીઓએ આત્મઘાતી હુમલો કરવાનું કાવતરું રચ્યું હતું. વિસ્ફોટકોથી ભરેલી કાર લઈને આવેલા આતંકવાદીઓ પોલીસ સ્ટેશનમાં ઘૂસવાનો પ્રયાસ કરી રહ્યા હતા, પરંતુ સુરક્ષા દળોની સમયસૂચકતાને કારણે આ મોટો હુમલો નિષ્ફળ રહ્યો હતો. જવાનોએ કરેલી વળતી કાર્યવાહીમાં વિસ્ફોટક કાર પોલીસ સ્ટેશન સુધી પહોંચે તે પહેલા જ નાશ પામી હતી અને તેમાં સવાર ૪ આતંકવાદીઓ ઠાર થયા હતા. જોકે, આ અથડામણમાં ૧૫ પોલીસકર્મીઓ ઘાયલ થયા હતા, જેમાંથી ૧૦ જવાનોને ગંભીર હાલતમાં વધુ સારવાર માટે પેશાવર ખસેડવામાં આવ્યા છે.

​ઘટના બાદ સમગ્ર ખૈબર પખ્તુનખ્વા વિસ્તારમાં સુરક્ષા દળોએ નાકાબંધી કરી દીધી છે અને મોટા પાયે સર્ચ ઓપરેશન શરૂ કરવામાં આવ્યું છે. જિલ્લા પોલીસ અધિકારી કેપ્ટન મોહમ્મદ ફુરકાન બિલાલે આ ઘટનાની પુષ્ટિ કરતા જણાવ્યું હતું કે, આતંકવાદીઓના આ કાવતરાને તોડી પાડવા અને તેમની પાછળ રહેલા માસ્ટરમાઇન્ડ સુધી પહોંચવા તપાસ તેજ કરવામાં આવી છે.

​ઉલ્લેખનીય છે કે, પાકિસ્તાનમાં સુરક્ષા દળો અને પોલીસ સ્ટેશનો પર હુમલાની ઘટનાઓ વધી રહી છે. ચાલુ વર્ષે એપ્રિલ મહિનામાં પણ બન્નૂમાં આવો જ આત્મઘાતી કાર બોમ્બ હુમલો થયો હતો, જેમાં ૫ નિર્દોષ નાગરિકોના મોત થયા હતા. હાલમાં આતંકવાદી ખતરાને ધ્યાનમાં રાખીને સરહદી વિસ્તારોમાં હાઈ એલર્ટ જાહેર કરવામાં આવ્યું છે. સુરક્ષા એજન્સીઓ ઘાયલો અને મૃતકોની અંતિમ યાદી તૈયાર કરી રહી છે, જ્યારે ઘટનાસ્થળે વધારાના સુરક્ષા દળોને તહેનાત કરી દેવામાં આવ્યા છે.