બસ્‍તી  તા.૧૭: ઉત્તર પ્રદેશના બસ્‍તી જિલ્‍લામાં માત્ર મેહણાં-ટોણાંના કારણે એક હસતો-ખેલતો પરિવાર ઉજડી ગયો. બાળકને કાળો-કલોટો કહીને ચીડવવાનો વિવાદ એટલો વધી ગયો કે પડોશમાં રહેતી મહિલાએ બીજી મહિલાની છાતીમાં ચપ્‍પુ મારી દીધું હતું. સામાન્‍ય બોલાચાલી જોતજોતામાં લોહિયાળ બની ગઈ અને એક મહિલાએ પોતાનો જીવ ગુમાવવો પડ્‍યો હતો. બસ્‍તીના રુધૌલી વિસ્‍તારમાં બનેલી આ સનસનાટીભરી ઘટના બાદ સમગ્ર ગામમાં દહેશતનો માહોલ છે.

રુધૌલી પોલીસ સ્‍ટેશન વિસ્‍તારમાં મંગળવારની સાંજે બધું સામાન્‍ય હતું. બાળકો રમી રહ્યા હતા, લોકો પોતપોતાના કામમાં વ્‍યસ્‍ત હતા, પરંતુ કોઈને અંદાજ નહોતો કે થોડી જ વારમાં એક સામાન્‍ય વિવાદ લોહિયાળ ખેલમાં બદલાઈ જશે. હકીકતમાં, ગામમાં આજુબાજુમાં રહેતી બે મહિલાઓના પરિવારો વચ્‍ચે બાળકોને લઈને બોલાચાલી શરૂ થઈ હતી. આરોપ છે કે બાળકને કાળો-કલોટો કહીને ચીડવવામાં આવી રહ્યો હતો. આ બાબતને લઈને બંને પક્ષો વચ્‍ચે દલીલો શરૂ થઈ ગઈ હતી. પ્રત્‍યક્ષદર્શીઓના જણાવ્‍યા અનુસાર જોતજોતામાં વિવાદ એટલો વધી ગયો કે બંને મહિલાઓ વચ્‍ચે ઝીણી તકરાર થવા લાગી હતી.

આ દરમિયાન ગુસ્‍સામાં આવીને ખુશનુમા નામની મહિલાએ પડોશમાં રહેતી માજીદા પર ચપ્‍પુ વડે હુમલો કરી દીધો હતો. ચપ્‍પુ વાગતાની સાથે જ માજીદા લોહીલુહાણ થઈને જમીન પર ઢળી પડી હતી. ઘટના બાદ ઘટનાસ્‍થળે અફરાતફરી મચી ગઈ હતી. પરિવારના સભ્‍યો અને ગ્રામજનો ઘાયલ મહિલાને તાત્‍કાલિક હોસ્‍પિટલ લઈ ગયા હતા. ગંભીર હાલતમાં માજીદાને સંતકબીરનગર જિલ્‍લાના સેમરિયાવાં સામુદાયિક આરોગ્‍ય કેન્‍દ્ર (CHC) ખાતે લઈ જવામાં આવી હતી, જ્‍યાં ડોક્‍ટરોએ તપાસ બાદ તેને મૃત જાહેર કરી હતી. મહિલાના મોતના સમાચાર મળતા જ પરિવારમાં હડકંપ મચી ગયો છે.

બીજી તરફ, ગામમાં પણ આ ઘટનાને લઈને દહેશત અને સન્નાટો છવાઈ ગયો છે. લોકોને વિશ્વાસ નથી આવી રહ્યો કે બાળકોને લઈને શરૂ થયેલો વિવાદ આટલી મોટી ઘટનાનું સ્‍વરૂપ લઈ લેશે. માહિતી મળતાં જ રુધૌલી પોલીસ ઘટનાસ્‍થળે પહોંચી ગઈ હતી અને ઘટનાસ્‍થળનું નિરીક્ષણ કર્યું હતું. પોલીસે મૃતદેહને કબજામાં લઈ પોસ્‍ટમોર્ટમ માટે મોકલી આપ્‍યો છે. આ સાથે જ આરોપી મહિલા ખુશનુમાને કસ્‍ટડીમાં લઈને પૂછપરછ શરૂ કરવામાં આવી છે.

સીઓ કુલદીપ યાદવનું કહેવું છે કે, ખુશનુમા નામની મહિલા બાળકના રંગરૂપને લઈને મજીદા નામની મહિલાના બાળક પર ખોટી કમેન્‍ટ્‍સ પાસ કરતી હતી, જેને લઈને તે ખુશનુમાના ઘરે ફરિયાદ કરવા આવી હતી. તે જ દરમિયાન ખુશનુમાએ મજીદા પર ચપ્‍પુથી હુમલો કરી દીધો હતો, જેમાં તે ગંભીર રીતે ઘાયલ થઈ ગઈ હતી. પરિવારજનો તાત્‍કાલિક તેને સંતકબીરનગર જિલ્‍લાની સેમરિયાવાં ઘ્‍ણ્‍ઘ્‍ પર લઈ ગયા હતા, જ્‍યાં ડોક્‍ટરોએ તેને મૃત જાહેર કરી હતી. આરોપી મહિલાની પોલીસે ધરપકડ કરી લીધી છે. મૃતદેહનું પોસ્‍ટમોર્ટમ કરવામાં આવી રહ્યું છે અને પોસ્‍ટમોર્ટમ રિપોર્ટના આધારે આગળની કાનૂની કાર્યવાહી કરવામાં આવશે