નંદીગ્રામ, તા.૧૫: પશ્ચિમ બંગાળની હાઈપ્રોફાઈલ અને રાજકીય રીતે અત્યંત સંવેદનશીલ ગણાતી નંદીગ્રામ વિધાનસભા બેઠકની પેટાચૂંટણી માટે ભારતીય જનતા પાર્ટી (BJP) એ એક મોટો અને માસ્ટરસ્ટ્રોક સમાન ભાવનાત્મક દાવ ખેલ્યો છે. ભાજપે સુવેન્દુ અધિકારીના સ્વર્ગસ્થ પૂર્વ અંગત સહાયક (PA) ચંદ્રનાથ રાથના માતા હસીરાની રાથને નંદીગ્રામ બેઠક પરથી પોતાના સત્તાવાર ઉમેદવાર તરીકે જાહેર કર્યા છે. ૧૯૯૮થી સક્રિય રાજકારણમાં જોડાયેલા અને પંચાયત ક્ષેત્રે વિશાળ અનુભવ ધરાવતા હસીરાનીની ઉમેદવારીથી નંદીગ્રામના ચૂંટણી સંગ્રામમાં ભારે ગરમાવો આવી ગયો છે.

ઉલ્લેખનીય છે કે, સુવેન્દુ અધિકારીના ખાસ ગણાતા ચંદ્રનાથ રાથની ગત ૬ મેના રોજ ઉત્તર ૨૪ પરગણાના મધ્યમગ્રામમાં અંધાધૂંધ ગોળીબાર કરીને ઘાતકી હત્યા કરવામાં આવી હતી. આ હાઈપ્રોફાઈલ હત્યા કેસની તપાસ હાલ સીબીઆઈ (CBI) કરી રહી છે. ઉમેદવારી પત્ર ભરતા પહેલા હસીરાની રાથે નંદીગ્રામના સિદ્ધેશ્વર શિવ મંદિર અને જાનકીનાથ મંદિરમાં પૂજા-અર્ચના કરી હતી. ત્યારબાદ તેમણે સુવેન્દુ અધિકારી અને સેંકડો ભાજપ કાર્યકરોના વિશાળ સમર્થન સાથે હલ્દિયા સબ-ડિવિઝનલ ઓફિસ ખાતે પોતાનું ઉમેદવારી પત્ર સબમિટ કર્યું હતું. તેમણે સુવેન્દુ અધિકારીને પોતાના પરિવારના વાલી ગણાવતા ૧.૧૦ લાખ મતોના વિશાળ અંતરથી જીતવાનો દ્રઢ વિશ્વાસ વ્યક્ત કર્યો હતો.

૨૦૨૬ની વિધાનસભા ચૂંટણીમાં સુવેન્દુ અધિકારીએ નંદીગ્રામ અને ભવાનીપુર બંને બેઠકો પર વિજય મેળવ્યો હતો. ત્યારબાદ તેમણે ભવાનીપુર બેઠક જાળવી રાખીને નંદીગ્રામ બેઠક ખાલી કરી હતી, જેના કારણે અહીં પેટાચૂંટણી યોજાઈ રહી છે. આ બેઠક પર તૃણમૂલ કોંગ્રેસ (TMC) એ સંચિતા પ્રધાન ડે ને મેદાનમાં ઉતાર્યા છે, જ્યારે ડાબેરી પક્ષો, કોંગ્રેસ અને TMC ના બળવાખોર જૂથે પણ પોતાના ઉમેદવારો ઊભા રાખતા અહીં રસપ્રદ બહુપાંખિયો મુકાબલો સર્જાયો છે. નંદીગ્રામ અને રેજીનગર બેઠકો માટે ૬ ઓક્ટોબરે મતદાન યોજાશે અને ૯ ઓક્ટોબરે મતગણતરી હાથ ધરવામાં આવશે.