જયપુર:  રાજસ્થાનમાં યોજાયેલી નગરપાલિકા અને મ્યુનિસિપલ ચૂંટણીઓના પરિણામોમાં કોંગ્રેસ પક્ષને ભારે પરાજયનો સામનો કરવો પડ્યો છે. સ્થાનિક સ્વરાજ્યની ચૂંટણીઓ પૂર્વે પાયાના સ્તરે પક્ષને મજબૂત કરવા માટે કોંગ્રેસે ચલાવેલું "સંગઠન નિર્માણ અભિયાન" જમીની સ્તરે બિલકુલ નિષ્ફળ સાબિત થયું છે. ભાજપના મજબૂત ફ્લોર મેનેજમેન્ટ સામે કોંગ્રેસનો ગ્રાફ અત્યંત નીચે ફેંકાઈ ગયો છે, જેના પરિણામે રાજ્યની કુલ ૩૦૯ મ્યુનિસિપલ સંસ્થાઓમાંથી બે-તૃતીયાંશ કરતા પણ વધુ ભાગમાં ભાજપે પોતાના બોર્ડ બનાવીને ભવ્ય વિજય મેળવ્યો છે.

જાહેર થયેલા પરિણામો મુજબ, રાજ્યના ૯ જિલ્લાઓમાં કોંગ્રેસ પોતાનું ખાતું પણ ખોલાવી શકી નથી અને એકપણ મ્યુનિસિપલ બોર્ડ બનાવવામાં નિષ્ફળ રહી છે. જેમાં પશ્ચિમ રાજસ્થાનના બાડમેર, બાલોત્રા, ફલોદી અને પાલી; પૂર્વ રાજસ્થાનના ભરતપુર અને ડીગ; આદિવાસી વિસ્તાર ધરાવતો ડુંગરપુર તેમજ હાડોતી-અજમેરને અડીને આવેલા કોટા અને બેવર જિલ્લાનો સમાવેશ થાય છે. આ સિવાય અજમેર, બાંસવાડા, જેસલમેર, જાલોર, પ્રતાપગઢ અને સિરોહી જેવા અડધો ડઝન જિલ્લાઓમાં કોંગ્રેસ માત્ર ૧-૧ બોર્ડ સુધી જ સીમિત રહી ગઈ છે.

રાજકીય વિશ્લેષકોના જણાવ્યા અનુસાર, કોંગ્રેસની આ કારમી હાર પાછળ નબળું ફ્લોર મેનેજમેન્ટ અને યોગ્ય રણનીતિનો અભાવ મુખ્ય કારણો છે. કાઉન્સિલર ચૂંટણી સુધી મજબૂત દેખાતી કોંગ્રેસ પાલિકા પ્રમુખ/મેયરની ચૂંટણી નજીક આવતા વેરવિખેર થઈ ગઈ હતી. પક્ષ પોતાના જ કાઉન્સિલરોને સાચવવામાં અને અપક્ષ ઉમેદવારો સાથે જોડાણ કરવામાં નિષ્ફળ રહ્યો હતો. આ ઉપરાંત ટિકિટ વિતરણ વખતે ઉભો થયેલો આંતરિક અસંતોષ અને નેતાઓ વચ્ચેનો જૂથવાદ પણ પરાજયનું મોટું કારણ બન્યો હતો. બીજી તરફ ભાજપે પોતાના તમામ ક્ષેત્રીય અને ટોચના નેતાઓને મેદાનમાં ઉતારીને સફળ કિલ્લાબંધી કરી હતી.

નગરપાલિકા ચૂંટણીના પરિણામોથી ચોંકેલા પ્રદેશ કોંગ્રેસ પ્રમુખ ગોવિંદ સિંહ દોતાસરા, વિરોધ પક્ષના નેતા ટીકારામ જુલી અને પૂર્વ મુખ્યમંત્રી અશોક ગેહલોત સહિતના નેતાઓએ રાજ્યની ભજનલાલ સરકાર પર સત્તાનો દુરુપયોગ કરવાનો અને સરકારી મશીનરી દ્વારા જનાદેશનો અનાદર કરવાનો ગંભીર આરોપ લગાવ્યો છે. સામે પક્ષે ભાજપે પોતાની જનકલ્યાણકારી યોજનાઓ અને કાર્યકરોના નેટવર્કના બળે આ ઐતિહાસિક જીત મેળવી હોવાનો દાવો કર્યો છે.