તિરુવનંતપુરમ :ભૂતપૂર્વ ડીજીપી આર. શ્રીલેખાએ તિરુવનંતપુરમ મ્યુનિસિપલ કોર્પોરેશનમાં કાઉન્સિલર પદેથી રાજીનામું આપ્યું છે, જે ભાજપ માટે એક મોટો રાજકીય પડકાર ઊભો કરે છે. તિરુવનંતપુરમ મ્યુનિસિપલ કોર્પોરેશનમાં ભાજપ સત્તામાં આવ્યાના થોડા મહિનાઓ પછી જ આ ઘટના સામે આવી છે, જ્યાં સસ્થામંગલમના કાઉન્સિલર આર. શ્રીલેખાએ મેયર વી.વી. રાજેશને પોતાનું રાજીનામું સુપરત કર્યું છે.

મેયર રાજેશે રાજીનામું મળ્યાની પુષ્ટિ કરતા જણાવ્યું છે કે આ મામલાને સૌહાર્દપૂર્ણ રીતે ઉકેલવા માટેના પ્રયાસો કરવામાં આવી રહ્યા છે. જોકે, કોર્પોરેશન સેક્રેટરી જે. મુહમ્મદ શફીએ સ્પષ્ટ કર્યું છે કે શ્રીલેખા દ્વારા મેયરને આપવામાં આવેલું રાજીનામું કાયદેસર રીતે માન્ય નથી, કારણ કે સક્ષમ અધિકારી સમક્ષ પત્ર રજૂ થયો નથી. જો આ રાજીનામું સ્વીકારવામાં આવે તો ૧૦૧ સભ્યોના કોર્પોરેશનમાં ભાજપના કાઉન્સિલરોની સંખ્યા ઘટીને ૪૯ થઈ જશે, જ્યારે હાલ ભાજપ એક સ્વતંત્ર કાઉન્સિલરના ટેકાથી સત્તા ટકાવી રહ્યો છે.

આ રાજકીય ઉથલપાથલ વચ્ચે ભાજપના અન્ય એક કાઉન્સિલર આર. સુગથન કોઈ કેસના સંદર્ભમાં જેલમાં છે, જેના કારણે પાર્ટીની સ્થિતિ વધુ મુશ્કેલ બની છે. પક્ષના સૂત્રોના જણાવ્યા અનુસાર, શ્રીલેખાએ ગત ૩૦ સપ્ટેમ્બરે રાજીનામું આપ્યું હતું અને ૫ ઓક્ટોબરે જિલ્લા કલેક્ટરને તેની નકલ સુપરત કરવાની યોજના છે. તેમણે રાજીનામા પાછળ વ્યક્તિગત કારણો રજૂ કર્યા છે, જ્યારે અહેવાલોમાં મેયર પદ ન મળવાના કારણે અસંતોષ હોવાની ચર્ચાઓ પણ વેગ પકડી રહી છે.

કેરળની પ્રથમ મહિલા આઈપીએસ અને પ્રથમ મહિલા પોલીસ મહાનિર્દેશક રહેલા આર. શ્રીલેખાના આ પગલાથી રાજકારણમાં ગરમાવો આવ્યો છે. અગાઉ પણ પક્ષીય સંકલન અને સ્થાનિક સ્વરાજ્યની સંસ્થાઓમાં આંતરિક અસંતોષને લઈને અનેક ચર્ચાઓ થતી રહી છે, ત્યારે આગામી દિવસોમાં ભાજપ હાઈકમાન્ડ આ મામલો થાળે પાડવા માટે કેવા રાજકીય પગલાં લે છે અને આ રાજીનામાના અંતિમ પરિણામો શું આવે છે તેના પર સૌની નજર રહેશે.